17| Ezemidlalo
Friday, 28 August 2026
Umqeqeshi wePirates nesexwayiso kubadlali
Akafuni bavuvukalelwe ngamakhanda ngenxa yokushaya izitha kabili kulandelana
NGUMQEQESHI wePirates (kwesokudla) u-Abdeslam Ouaddou.
ISITHOMBE NGABE: BACKPAGEPIX
Senzo Sokhela
UXWAYISA abadlali bakhe ngengozi umqeqeshi we-Orlando Pirates, u-Abdeslam Ouaddou, ngeSekhukhune United abazobhekana nayo okwesithathu kulandelana.
La makilabhu azobhekana emlenzeni wesibili we-semi final yeMTN8 ngoMgqibelo ngo-15h00 e-Orlando Amstel Arena, eSoweto. Emlenzeni wokuqala obungeledlule e-Old Peter Mokaba Stadium, ePolokwane, iBucs inqobe ngo-1-0.
La makilabhu azokube esetholana okwesithathu kulandelana njengoba ngoLwesibili abedlala oweBetway Premiership, onqotshwe yiPirates ngo-2-0 e-Orlando Amstel Arena.
ISekhukhune izokuya kulo mdlalo ngaphandle komqeqeshi wayo, uCedric Kaze, okhishwe ngekhadi elibomvu emdlalweni wangoLwesibili.
NGADLALI beBucs, uGhampani Lungu (okwesobunxele) noBoitumelo Radiopane oshaye igoli lokuqala lePirates ihlula iSekhukhune ngoLwesibili.
U-Ouaddou unike abadlali bakhe isexwayiso ngobungozi abangase bahlangabezane nabo kwiSekhukhune.
"Ukudlala nabantu kanjena kulandelana kuyawulimaza umqondo, ikakhulukazi njengoba besilokhu sinqoba. Le nto yokuthi uyabehlula ivele ikungene ekhanda.
"Kuzofanele siye kulo mdlalo singavuvukalelwe ngamakhanda, ngoba nakhu sesibehlule kabili kulandelana.
"Ngicabanga ukuthi manje yila abazokube beyingozi khona kakhulu ngoba bazolwela isithunzi sabo, kanti benjalo nje, bayafuna nabo ukuya kowamanqamu.
"Kuzofanele siye kulo mdlalo nemiqondo ehluzekile ngoba uma sizokuya ngokuthi sesiwunqobile sizokube sizifaka engozini," kusho u-Ouaddou.