Ugqugquzela inhlanzeko kubafundi umdlalo wengezo

Lomdlalo usematheni kulezi zinsuku...

Nhlanhla Hudla 

UFISA ukuwubona ukhula uze ufike ezingeni lesifundazwe umdlalo wengezo ezikoleni umsunguli wawo, uMnu Philani Dlamini (29), waseXobho odume ngelikaPrincipal Wengezo.

Lo mdlalo usematheni kulezi zinsuku kubafundi bezikole, njengoba kubukeka bewuthakasela ezindaweni eziningi.

Ezinkundleni zokuxhumana, abafundi abangabathandi balo mdlalo, ikakhulukazi laba abahamba amabanga amade ngezinyawo uma beya esikoleni, bayaye babonakale bephethe amahembe ngamakhothenga.

 Baphinde babonakale bepholisha izicathulo zicwebezele, ngaphambi kokungena esangweni lesikole, osekugqugquzele nabanye ukuba bakubone ukubaluleka kwenhlanzeko ezikoleni.

UDlamini osezakhele ugazi ezinkundleni zokuxhumana ngenxa yengezo, uthi into emenze waqala lo mdlalo, wukuthi ufuna ukubuyisa isithunzi ezikoleni, ngoba ziningi izinto ezimbi ezenziwa ngabantu abasha ngenxa yokungabi matasa.

Uthi inhloso yakhe enkulu ngalo mdlalo, wokuqhuba umkhankaso wokulwa nezidakamizwa, ukubuyisa isithunzi, nokuhlonipheka kwezikole.

Uthi ubambisene nabanye ozakwabo ukuqhuba lo mkhankaso.

"Kuyajabulisa ukubona likhula isasasa lalo mdlalo. Ukwenza lokhu, kudinga uthando okuyinto ekhonjiswa ngabafundi uma kunalo mdlalo.

"Sifisa ukubuyisa isithunzi sethu njengendlu emnyama, ukubona izingane zizimisela ngokuqhudelana nezinye zifake umfaniswano wesikole. Lokhu kunikeza wonke umuntu ithuba elilinganayo.

"Okungijabulisa kakhulu, wukuthi zininingi izindawo eseziqalile ukudlala lo mdlalo, okwenze saba nesifiso sokuthi siwubeke ezingeni leProvince.

"Sihlela ukumema izikole zaKwaZulu-Natal, ukuba zihlanganyele ndawonye ukwenza umcimbi omkhulu, ozohlanganisa zonke izikole," esho.

Eqhuba uthi, kumthokozisa kakhulu ukubona ezinkundleni zokuxhumana, kwanda isasasa lalo mdlalo.