NGUNKK Jacinta Ngobese-Zuma, ongumholi weMarch and March, eyenza umsebenzi obonakalayo kolokugodukiswa kwabokufika abakuleli bengenazo izimvume, babuyele emazweni abo.

Lucky Cain

UMASIPALA weTheku uphakamise ukuthi abeMarch And March, bashintshe usuku lombhikisho wabo ongomhla ka-30 ku-June 2026, lube ngolunye usuku.

ILANGA Lempelasonto lithole ukuthi njengoba iNingizimu Afrika ivungama ngokusondela kosuku lwangomhla ka-30 ku-June, oluthathwa njengomnqamulajuqu ebantwini bokufika abakuleli ngokungemthetho, abeMarch And March bebehlela ukuthi babe nombhikisho wokuzwakalisa izikhalo zabo ngalolu suku, ezitaladini zeTheku.

UNkk Jacinta Ngobese-Zuma ongumholi wale nhlangano,  ukhiphe isitatimende ethi, lo masipala uyenqaba ukuba babhikishe ngalolu suku.

Bathi bazolusukumela olokuchithwa kombhikisho abawuhlelile abe-March and March

Esitatimendeni sakhe uNkk Ngobese-Zuma, uveze ukuthi bathole ukuthi umyalelo wokuchithwa kwesicelo sabo sokubhikisha, siqhamuke kwimenenja kamasipala, uMnu Musa Mbhele.

Uthi ithe ukubhikisha kwabo ngalolu suku, kubeka engcupheni ezokuphepha kulo masipala. 

UNkk Ngobese-Zuma uthi bafuna incazelo ebhalwe phansi ngokuchi- thwa kwabo, wasabisa  ngokutha- tha izinyathelo zomthetho uma isicelo sabo sigcina singemuke- lekanga. 

Okhulumela amaPhoyisa kaMasipala weTheku, uColonel Boysie Zungu, uthe akulona iqiniso ukuthi basichithile isicelo sokuba babhikishe abeMarch And March.

Uthi babacele ukuthi bashintshe usuku abahlela ukubhikisha ngalo. Uthe basazohlangana nabo, badingide lolu daba.

Kubekwe ibhajethi
ka-R600 million ukuqapha isimo

Usuku lwangomhla ka-30 ku-June lwaphakanyiswa nguMnu Nkosikhona "Phakelumthakathi" Ndabandaba, ongomunye wabahola le mibhikisho emadolo- bheni ahlukene eNingizimu Afrika.

Kusukela lolu suku lwaphakanyi-swa, uhulumeni ubulokhu uxwayisa ngokuthi uzosiqapha isimo ukuqinisekisa ukuphepha kwempahla nomphakathi.

UMengameli wezwe uMnu Cyril Ramaphosa, waze wethula inkulumo yesizwe, ecacisa ngezinhlelo uhulumeni onazo ukuqinisekisa ukuthi bayabhekana nenkinga yabokufika abakuleli ngokungemthetho.

UNgqongqoshe wamaPhoyisa uMnu Firoz Cachalia, esithangamini sabezindaba, udalule ukuthi uMnyango wamaPhoyisa usubeke ibhajethi ka-R600 million, ukubhekana nosuku lwangomhla ka-30 kuJune, njengoba kunabathile abasola ukuthi kungase kube nodlame.