IPirates ivuma eyokusinda kwehlela kweyeCaf

NGUMQEQSHI wePirates, u-Abdeslam Ouaddou.

ISITHOMBE NGABE: BACKPAGEPIX

Senzo Sokhela

WENZA isicelo kubalandeli be-Orlando Pirates umqeqeshi wale kilabhu, u-Abdeslam Ouaddou njengoba ibhekene nomqansa emdlalweni wayo weCaf Champions League.

IBucs izobhekana neSt Eloi Lupopo yaseDemocratic Republic of Congo (DRC) emlenzeni wesibili walo mqhudelwano ngoMgqibelo ngo-15h00 e-Orlando Stadium, eSoweto.

EziMnyama ziya kulo mdlalo nje, ziphefumula ngenxeba njengoba zinenebulwe yiLupopo ngo-3-0 emlenzeni wokuqala wesigaba sesibili sokuhlunga seChampions League ngeledlule eDRC.

IBucs izamile ukubuyisa ukuzethemba iguqisa iPolokwane City ngo-1-0 wegoli likaTshepang Moremi koweBetway Premiership ngoLwesithathu ebusuku e-Orlando Stadium, eSoweto, okuyibeke endaweni yesibili kwi-log yalesi sigaba okuqhwakele kusona iMamelodi Sundowns.

NGABADLALI beDowns nabeRemo Stars ngesikhathi la makilabhu ebhekene emlenzeni wokuqala weCaf Champions League.

ISITHOMBE NGABE: BACKPAGEPIX

U-Ouaddou ekhuluma nabezindaba emuva kwalo mdlalo, unxuse abalandeli beBucs ukufika ngobuningi uma sebebhekene neLupopo, ukuyogqiba izitha zabo, bazifakele nengcindezi.

"Engikuqaphele ngalo mdlalo wePolokwane wukuthi amathuba siyawathola, kodwa sihluleke wukuwasebenzisa. Yiyona indawo engikholwa wukuthi sisaxega kuyona, okuyiphambi kwamapali.

"Emdlalweni wangoMgqibelo sidinga amagoli, kufanele sinqobe ngo-4-0 ukuze sidlulele emzuliswaneni olandelayo.

"Engikucelayo wukuthi abalandeli bethu baphume ngobuningi babo ukuzoseseka ngoba sibadinga ngendlela eyisimanga kulo mdlalo. Kuzosijabulisa ukubona inkundla yethu igcwele phama, besifuqa," kusho u-Ouaddou.

NGUSOMAQHINGA weRemo, uTiago Conde.

ISITHOMBE NGABE: BACKPAGEPIX

Ngakolunye uhlangothi, usomaqhinga weRemo Stars yaseNigeria, UTiago Conde, uthi kakukapheli ngabo kwiChampions League yize iSundowns ibalobole ngo-5-1 emlenzeni wokuqala obuseNigeria.

La makilabhu azobhekana emlenzeni wesibili ongeSonto ngo-15h30 eLucas Moripe Stadium, e-Atteridgeville.

"Siyayihlonipha iSundowns futhi ingenye yamakilabhu amakhulu e-Afrika. Sizithathile izifundo kulo mdlalo esihlulwe kuwona.
Sesikwenze konke ukulungisa amaphutha esiwenzile.

"Engifuna ukukusho wukuthi kakuphelile ngathi, kodwa uma yona icabanga kanjalo kulungile, ingazisoli. Yibhola leli, kwenzeka izinto ezingakholakali," kusho uConde.