ILeopards nethemba lokujika izinto kwiMFC

NGUMQEQESHI weLeopards, uJoel Masutha (ophethe ibhola)

ISITHOMBE NGABE: BACKPAGEPIX

Mfanafuthi Ndlovu

KAYIKALIPHONSI ithawula iBlack Leopards ngephupho layo lokulwela ukunqoba isigaba seMotsepe Foundation Championship (MFC) kule sizini ukubuyela esigabeni esikhulu seBetway Premiership.

Le kilabhu iyiqale kabi le sizini njengoba ihleli endaweni yesithathu uma usuka emsileni ngamaphuzu awu-5 emidlalweni ewu-6 ekubeni iCasric Stars - eqhwakele kwi-log yalesi sigaba - inamaphuzu awu-17 emidlalweni ewu-7.

Nakuba izinto zimi ngalolu hlobo, kodwa iLeopards izibona izokwazi ukunyuka kwi-log ngokuqoqa amaphuzu agcwele emidlalweni yayo, kusuka koweMilford ezoshukana nayo ngoLwesihlanu ngo-15h30 eMhlathuze Sports Complex, eRichards Bay.

ILeopards ihambela phezulu muva nje, emuva kokuxebula iKruger United ngo-3-0 koweMFC ngeledlule.

NGUSIPHOSETHU Ndlabi weMilford (okwesobunxele) noZukile Mkhize weLeopards ngesikhathi esagijima kwiRoyal AM esiiwumlando ebholeni laseNingizimu Afrika.

ISITHOMBE NGABE: BACKPAGEPIX

UJoel Masutha oqeqesha iLeopards, ubonga izikhulu zale kilabhu ngokuba nesineke kuyena ngesikhathi bebhekene nengwadla yokungakwazi ukusayinisa abadlali abasha, obekudalwa yisigwebo seFifa.

Uthi konke sekudlulile, okumqoka manje wukuqinisekisa ukuthi bayinqoba yonke imidlalo esele ngaphambi kwekhefu le-Africa Cup of Nations (Afcon) elingoDecember.

"Sizimisele ngokuthatha umdlalo ngamunye. Kufanele singene enkundleni sengathi sithelwe ngezibonkolo uma sesibhekene neMilford FC. Kasiyesabi yize ngazi ukuthi iyingozi uma isenkundleni yayo," esho.

Kubadlali ababhekiwe kulo mdlalo uBethuel Muzeu, uThendo Mukumela noZukile Mkhize kanti kwiMilford FC kukhona uSiphosethu Ndlabi, uMvelo Zikakayo noSfiso Mdluli ukubala nje abambalwa.

* Isiyonke imidlalo yeMFC imi kanje:-
NGOLWESIHLANU
EMhlathuze Sports Complex: Milford FC vs Black Leopards 15h30.
EGelvandale Stadium: Highbury FC vs Casric Stars 15h30.
NGOMGQIBELO
E-Olympia Park: Lerumo Lions vs Leicesterford City 15h30.
KaNyamazane: Kruger United vs Gomora United 15h30.
E-Absa Tuks: University of Pretoria vs Upington City 15h30.
E-Athlone: Cape Town City vs The Bees 15h30.
EMxolisi Dicky: Hungry Lions vs Baroka FC 15h30.
NGESONTO
EThohoyandou Stadium: Venda FC vs Midlands Wanderers 15h30.