Ugabe ngesipiliyoni sezindebe umqeqeshi weDurban City

NGUMQEQESHI weDurban City, uGavin Hunt (okwesobunxele) enabadlali bakhe, bezilungiselela umdlalo weCarling Knockout.

ISITHOMBE NGABE: BACKPAGEPIX

Mfanafuthi Ndlovu

UGABE ngesipiliyoni sokunqoba izinkomishi uGavin Hunt ongumqeqeshi weDurban City ezovovana inkani neRichards Bay FC kwiQuarter final yeCarling Knockout ezokuba ngoMgqibelo ngo-15h00 eMhlathuze Sports Complex, eRichards Bay.

IKwaZulu-Natal isenhlanhleni kule sizini njengoba nakanjani izokuba nekilabhu ezodlulela kuma-semi final alo mqhudelwano, ovikelwa yiMagesi FC ezodlala ne-Orlando Pirates ngoLwesithathu ngo-19h00 e-Orlando Stadium, eSoweto.

Lo mdlalo uzokuba phakathi nesonto nje, yingenxa yokuthi iBucs igijima kwiCaf Champions League kule mpelasonto.

Ukubuyela odabeni lukaHunt, lo mqeqeshi unomlando obambekayo wokuqukula izinkomishi njengoba egcine ngeMTN8 ayidla ecija iBidvest Wits engasekho kunobhutshuzwayo waseNingizimu Afrika.

Ngaphambi kwalokho, wanqoba isicoco seligi amahlandla amathathu amasizini elandelana ecija iSuperSport United.

NGABADLALI beBay FC bevivela umdlalo wangempelasonto nomkhaya babo, iCity.

ISITHOMBE NGABE: BACKPAGEPIX

UHunt uthi nakuba besazikhotha amanxeba njengoba beguqiswe ngamaZulu FC ngo-1-0 seliyoshona koweligi ngeledlule eMoses Mabhida Stadium, eThekwini, kodwa bazimisele ngokuvuka ngeBay ukuqinisekisa ukuthi badlulela kuma-semi final okokuqala ngqa kulo mqhudelwano abaqalayo ukuwudlala.

Ubheke ukuthi umlando uziphinde njengoba neMagesi FC idle ubhedu kulo mqhudelwano ekubeni bekuyisizini yayo yokuqala esigabeni esikhulu nyakenye.

"Siwubheke ngabomvu lo mdlalo. Siyayazi inkundla esizodlala kuyona, yize sigijime ingeyinhle ngaphambi kokuqala kwesizini, kodwa ngiyazi ukuthi isilungiswe kahle," kusho uHunt.

Uthi yize engeke akhulume kakhulu ngokunqoba lo mqhudelwano ngoba kusasekuseni, kodwa uwabona emakhulu amathuba okuthi iKwaZulu-Natal imelwe kowamanqamu njengoba isenamakilabhu amathathu asele.

ILamontville Golden Arrows izoshukana neTS Galaxy ngeSonto ngo-15h00 eKing Zwelithini Stadium, eMlazi. I-Arrows ibuya endukwini eyithole kwiStellenbosch FC kuba ngu-4-3 koweligi ngoLwesithathu eWestern Cape.

Isiyonke imidlalo yamaQuarter final yeCarling Knockout imi kanjena:
NGOMGQIBELO
EMhlathuze Sports Complex: Richards Bay FC vs Durban City 15h00.
NGESONTO
EKing Zwelithini Stadium: Golden Arrows vs TS Galaxy 15h00.
NGOLWESITHATHU
E-Orlando Stadium: Orlando Pirates vs Magesi FC 19h00.
EDr Molemela Stadium: Marumo Gallants vs Stellenbosch FC 19h00.