NGU-KHALIL Ben Youssef ongomunye wabaqeqeshi beKaizer Chiefs.

Senzo Sokhela

USONGELA omkhaya bezakhe umqeqeshi weKaizer Chiefs uKhalil Ben Youssef njengoba ezakhe sezivukile emaqandeni. IChiefs izobhekana nomkhaya i-Orlando Pirates koweBetway Premiership ngeSonto ngo-15h00 eFNB Stadium, eGoli.

IChiefs iya kulo mdlalo nje, ihambela phezulu njengoba emidlalweni engu-6 eyedlule inqobe emihlanu, yadlala ngokulingana kowodwa.
Nokho isanesilonda esibhibhayo njengoba emzuliswaneni wokuqala iBucs iyitaxe ngomubi u-3-0. UBen Youssef uthi kulokhu iBucs izobona into engakaze iyibona kwezakhe.

KUZOPHELA ukumoyizelelana kumqeqeshi wePirates
u-Abdeslam Ouaddou noweChiefs uCedric Kaze uma la makilabhu esetholana phezulu ngesonto.

"Okungijabulisayo ngalo mdlalo wukuthi ufike ngesikhathi esihle nathi sinokuzethemba kwazise sike sanqoba imidlalo engu-5 ilandelana ngaphambi kokuba sidlale ngokulingana nePolokwane City emdlalweni wethu owedlule. Ngifuna ukusho ukuthi ngeke nangengozi kube lula njengasekuqaleni sibhekene nayo.

"Emzuliswaneni wokuqala isithole kabi sinezinkinga zokulinyalelwa yisikimu, silokhu sisishintsha njalo. Manje yonke into ibukeka ihamba kahle. Noma kanjani izosifica siyilindele futhi sizokwenza isiqiniseko sokuthi siyanqoba kulokhu,'' kusho uBen Youssef.

ABALANDELI beChiefs bathenjiswa injabulo emdlalweni wayo neBucs ngeSonto.

Uthi abalandeli babo abangatatazeli noma kanjani bazowenza umsebenzi kulokhu.

"Empeleni thina asinabo abalandeli, sinomndeni singumuntu munye. Konke esiyokwenza kulo mdlalo sizokwenzela umndeni wethu. Nginesiqiniseko sokuthi bazowujabulela umphumela wangeSonto.''