ISUNDOWNS ilahle amaphuzu amabili isiphethe amathathu esandleni ngemizuzu yokugcina, uKhulumani Ndamane edlalisa kabi uChumani Butsaka weStellenbosch FC.

Ufuna ezakhe zibuye namaphuzu agcwele eRichards Bay

Senzo Sokhela

UBOPHE ngabhande linye egxeka abadlali beMamelodi Sundowns uMiguel Cardoso ongumqeqeshi wale kilabhu ecasulwa wukulahla kwayo amaphuzu amqoka umdlalo usuyophela.

IDowns ibambane ngo-1-1 neStellenbosch FC koweBetway Premiership ngoLwesithathu ebusuku eLoftus Stadium, ePitoli. IDowns yiyona evule inkundla uTsiki Ntsabeleng elivalela enethini.

NGUMQEQESHI weMamelodi Sundowns uMiguel Cardoso.

Umdlalo usuyophela uKhulumani Ndamane wenze iphutha eshweba ibhola esebhokisini wavele wakhahlela umdlali weStellies, unondweba wangananaza wabeka iphenathi. Ibe isivalelwa enethini nguTshegofatso Mabasa obolekiswe yi-Orlando Pirates kwiStellies kuze kuphele isizini.

Ukulahla kweDowns amaphuzu kwenze iPirates yaqhubeka nokuhlala esicongweni se-log. UCardoso obedinwe eqhuma emuva kwalo mdlalo, ubophe ngabhande linye abadlali bezakhe njengoba ebasole ngokwenzela phansi le kilabhu.

UNOZINTI weMamelodi Sundowns uRonwen Williams uyivimbe wayichithela phakathi iphenathi, wagiya wanconcoza uTshegofatso Mabasa weStellies.

"Ngidumele ngalo mphumela, lo mdlalo bekufanele siwunqobe kalula kodwa ngobudedengu bethu salahla amaphuzu amqoka. Wonke umuntu kufanele azinuke amakhwapha ngokwenzeke kulo mdlalo, sonke senze amaphutha. Kangazi ukuthi sikuvumele kanjani ukuphisana ngegoli elinjeyana umdlalo usuyophela," esho.

IDowns ilahla amaphuzu nje, ibhekene nomdlalo onzima ezowugijima neRichards Bay FC ngeSonto ngo-15h00 eMhlathuze Sports Complex, eRichards Bay. IBay kayigayelwa mphako kule nkundla yayo njengoba kungaphumi lutho muva nje.

YINKUNDLA iRichards Bay Sports Complex ezosingatha umdlalo weMamelodi Sundowns neRichards Bay FC.

"Kuzofanele sishintshe ukwenza uma sizimisele ngokunqoba lo mdlalo. Ngeke ube lula ngoba sizokube siqala ukuyodlala kule nkundla, kasiyazi nhlobo. Kodwa kasikwazi ukuphinda silahle amaphuzu, kufanele senze isiqiniseko sokuthi siyawunqoba lo mdlalo," esho.

Isiyonke imidlalo yeBetway Premiership engempelasonto iqhathwe kanje:-
NGOLWESIHLANU
EChatsworth Stadium: Durban City vs Orbit College 19h30.
EKing Zwelithini: Golden Arrows vs Siwelele 19h30.
NGOMGQIBELO
EMoses Mabhida Stadium: AmaZulu vs Chippa United 15h00.
EPeter Mokaba Stadium: Sekhukhune United vs Marumo Gallants 17h30.
NGESONTO
E-FNB Stadium: Orlando Pirates vs Kaizer Chiefs 15h00.
E-Old Peter Mokaba Stadium: Polokwane City vs Stellenbosch 15h00.
EMbombela Stadium: TS Galaxy vs Magesi 15h00.
EMhlathuze Sports Complex: Richards Bay vs Mamelodi Sundowns 17h30.