NGUNGQONGQOSHE wezokuVikela, uNkk Angie Motshekga, noNkz Thembi Simelane ongungqongqoshe wezokuhlaliswa kwabantu, benika omunye womakadebona bomzabalazo indlu.

Menzi Jele

BEBEHLEKA kuvele elomhlathi omakadebona ababeyingxenye yomzabalazo wenkululeko, ngesikhathi befakwa ezindlini zomxhaso, ngaphansi kukaMasipala waseMswathi, eMgungundlovu, ngoLwesithathu.

Lezi zindlu zakhiwe ngaphansi kohlelo oluqhutshwa wuMnyango wezokuHlaliswa kwaBantu noMnyango wezokuVikela, olwaziwa ngeMshwathi Intergrated Presidential Proramme. Lolu hlelo luzokwakha izindlu zomxhaso eziwu-2 922, kanti-ke seziwu-744 eseziqediwe ukwakhiwa.

Emcimbini obusezinkundleni zemidlalo, eTrust Feed, izolo, uMnu Mandla Shezi (62), wakhona eTrust Feed - ongomunye wabahlomulile - uthe besekuphele iminyaka elinde lezi zindlu.

"Ngathi silele siyaphupha, kanti cha, izindlu sekungezethu ngempela. Siyabonga kubaholi abakhombisile ukuthi basikhathalele. Sike sahlaselwa yizimvula ezinamandla lapha eMswathi, lokhu sekusithobe amanxeba," esho.

UNgqongqoshe wezokuHlaliswa kwaBantu, uNkz Thembi Simelane; uNgqongqoshe wezokuVikela, u-Angie Motshega, uNgqongqoshe wezokuHlaliswa kwaBantu KwaZulu-Natal, uMnu Siboniso Duma; iMeya yaseMshwathi, uMnu Mandla Zondi neMeya yaseMgungundlovu, uMnu Mzi Zuma, yibona abebefaka abantu ezindlini.

UNkz Simelane uthe bahlose ukunika omakadebona abalwela inkululeko yezwe ukuhlonipheka.

"Bekuthiwa abantu abayibamba ishisa ngesikhathi somzabalazo, sesibakhohliwe, kanti kakunjalo. Lezi zindlu ziwumphumela weqhaza abalibamba.

"Neminye imiphakathi izohlomula kulolu hlelo, ngoba luyingxenye yohlelo lukahulumeni,  iSiyahlola, olubheka ukuqhutshwa kwezinhlelo zentuthuko," kusho uNgqongqoshe Simelane.

Ubuholi bukahulumeni budlulele eCornubia, eThekwini, buyohlola uhlelo lokwakhelwa kwabantu abakhahlanyezwa yizikhukhula izindlu.
menzi.jele@ilanganews.co.za