Isasasa liphoqe abakhiqizi ukwandisa izinsuku zomdlalo kamabonakude

NGESINYE seziqephu zeHomecoming, okubonakala kuzo uThembinkosi Mthembu, okwesobunxele.

Lucky Cain

ISASASA lomdlalo owuchungechunge kamabonakude, iHomecoming, liphoqe abakhiqizi nabadidiyeli balo mdlalo ukuba bandise izinsuku okhonjiswa ngazo esiteshini esingaphansi kweMultichoice, uMzansi Wethu (Channel 163).

Lo mdlalo ogabe ngabalingisi abanohlonze, ukhonjiswa izinsuku ezintathu - kusukela ngoMsombuluko kuya kuLwesithathu, ngo-18h30.

Ngokwesitatimende esikhishwe ngabakwaMultichoice, isasasa lababukeli nengcindezi abebeyifaka, befuna kwandiswe izinsuku, yikhona okugcine kuphoqa ukuba kube nezinguquko ngezinsuku okukhonjiswa ngazo lo mdlalo.

Kusukela ngoMsombuluko, mhla ka-27 kwephezulu, lo mdlalo usuzokhonjiswa izinsuku eziwu-5 - kusuka ngoMsombuluko kuze kushaye uLwesihlanu.

NGU-SIX Nyamane odlala indawo kaZethu.

Echaza ngalesi sinqumo uShirley Adonisi oyisikhulu esiphezulu kwaMultichoice, uthe ukwandisa izinsuku zalo mdlalo kufike ngesikhathi esihle impela kuMzansi Wethu, njengoba bethula nemidlalo okubalwa kuyona iMamas Boy, nokubuya kwesizini yesithathu yohlelo, KwaNjomane.

"Sinesiqiniseko sokuthi ababukeli bazozithokozela lezi zinguquko esiza nazo kuMzansi Wethu," esho.

IHomecoming isematheni kulezi zinsuku njengoba uZethu (Six Nyamane) ongudokotela elotsholwa, elungiselela ukungena esithenjini, okuyisinqumo esingabanga lula ukusamukela emndenini wakhe.

NGUKHOMBI Phetla odlala indawo kaMatron Mnisi.

Inkampani eqopha lo mdlalo, iTshedza Pictures, iveze ukuthi kuyayithokozisa ukuthi lo mdlalo usheshe wafinyelela ezinhliziyweni zababukeli.

 "Ukuphoqa ukuthi kwande izinsuku, kukhombisa ngokusobala ukuthi abantu bayawuthakasela umsebenzi wethu, futhi nesiteshi sizibophezele ukweseka ithalente lakuleli," kusho uPhathu Makwerela oyisikhulu esiphezulu seTshedza Pictures.

IHomecoming igabe ngabalingisi okubalwa kubo uThembinkosi Mthembu, u-Amahle Khumalo, uSipho Manzini, uKhombi Phetla, uMpilo Mbatha noKhayalethu Xaba.