Senzo Sokhela

INHLANGANO eyengamele unobhutshuzwayo emhlabeni, iFederation of International Football Association (Fifa), ivulele amakilabhu azodlala kwiFifa Club World Cup iwindi lokuthenga abadlali eliyisiphesheli ukuze wonke azodlala kulo mqhudelwano asayinise abadlali abafunayo.

Lo mqhudelwano uzoqala ngomhla ka-14 kuJune, usongwe ngomhla ka-13 kuJuly e-United States of America (USA).
Ngokomthetho weFifa, iwindi lokudayiselana ngabadlali emhlabeni jikelele lisuke livaliwe njengoba lize livulwe ngomhla ka-1 kuJuly.

Ngenxa yalesi sizathu, iFifa imemezele ukuthi izovulela amakilabhu azobe eyingxenye yalo mqhudelwano iwindi lezinsuku eziwu-10, kusuka mhla lulunye kuJune kuze kube wumhla ka-10 kuyona le nyanga.

IMamelodi Sundowns yiyona emele iNingizimu Afrika kulo mqhudelwano obhekwe ngabomvu njengoba kwengezwe isibalo samakilabhu azodlala kuwona.

Emazweni amele i-Afrika kungabalwa i-Al Ahly yase-Egypt, iWydad Athletic Club yaseMorocco ne-ES Tunis yaseTunisia.

NGU-CRISTIANO Ronaldo okuke kwavela ukuthi angase asayine kwiWaydad Casablanca yaseMorocco ezobamba iqhaza kwiFifa Club World Cup.

ISITHOMBE NGABE: BACKPAGEPIX

* Khonamanjalo, iWydad isimemezele ukuthi isezinhlelweni zokwelula inkontileka kaThembinkosi Lorch emeboleke kwiSundowns nekaCassius Mailula owebolekwe kwiToronto yase-USA.

Izinkontileka zalaba badlali ziyaphela ngomhla ka-30 kuJune kanti le kilabhu ifuna ukuzelula njengoba izoya nabo kwiClub World Cup.

Le kilabhu kuke kwabikwa ukuthi ifuna uthuli uCristiano "CR7" Ronaldo wasePortugal ophelelwa yinkontileka ne-Al Nassr yaseSaudi Arabia. Kuthiwa ifuna ukumusayinisa inkontileka yesikhashana ukuze ezodlala kulo mqhudelwano.

IWydad iyakuphika lokho, kodwa iyakuqinisekisa ukuthi kukhona abadlali ezobasayinisa ukudlala lo mqhudelwano.