Uqiniswa idolo yinqubekela phambili ayibona kwiChiefs

UKaze unethemba lokuhamba ibanga elide kwiCaf Confederation Cup

NGU-CEDRIC Kaze ongomunye wabaqeqeshi ababambile kwiKaizer Chiefs.

Nhlanhla Hudla

UQINISWA idolo yinqubekela phambili ayibona kwiKaizer Chiefs uCedric Kaze ongomunye wabaqeqeshi bale kilabhu ezobhekana neZesco United yaseZambia emlenzeni wokuqala kaGroup D kwiCaf Confederation Cup ngeSonto ngo-15h00 ekuhambeni.

Umlenze wesibili wala makilabhu uzokuba ngeSonto lomhla ka-1 kuFebruary ngo-15h00 eMoses Mabhida Stadium, eThekwini. IChiefs izokuya kule midlalo yeZesco ihambela phezulu njengoba iwuvule ngenothi eliphezulu unyaka iguqisa iLamontville Golden Arrows ngo-1-0 wegoli lika-Aden McCarthy koweBetway Premiership ngoLwesibili eGoli.

NGU-ADEN McCarthy nozakwabo uFlavio Silva bejabulela igoli emdlalweni weligi ne-Arrows

Lo mphumela wenze iziMpofana zaqhubeka nokuba mdibi munye namakilabhu asembangweni weligi.
UKaze uthi ubona benethuba elihle lokudlulela esigabeni somkhumulajezi kulo mqhudelwano weCaf, inqobo nje uma bezothola imiphumela emihle emidlalweni yabo esele kuleli qoqo.

"Nginethemba lokuthi sizokwazi ukwenza kahle ngoba sisebenza ngokukhulu ukubambisana kusuka phezulu kubaphathi bekilabhu kwehle njalo kuya kubadlali. Ngokubona kwami, senza umsebenzi omuhle uma ubheka lapho esiphuma khona.

"Ngeke sikugweme ukukhuluma okushiwo ngabantu ngathi, okwethu wukwenza umsebenzi enkundleni. Umdlalo wethu neZesco ubaluleke kakhulu ngoba yiwona ozocacisa ngebanga esingahle silihambe kulo mqhudelwano. Abadlali bayakwazi okumele bakwenze kulo mdlalo.

KUBHEKWE ukuba uMfundo Vilakazi asize ikilabhu yakhe iChiefs koweConfederation Cup njengoba engene nokushisa koweligi neGolden Arrows ngoLwesibili. 

"Siyazi ukuthi umdlalo ngeke ube lula ngoba sizobe sidlalela ekuhambeni kodwa into ebalulekile wukudlala kahle ekhaya nasekuhambeni, okuyinto okumele abadlali bethu beyenze ngokuzimisela," esho.

IChiefs ibambe isithathu kuleli qoqo ngephuzu emidlalweni emibili kanti iZesco isebhulekini njengoba seyehlulwe kuyo yomibili imidlalo esayigijimile.

*Komunye umdlalo weConfed Cup, iStellenbosch FC izogadulisana neCR Belouizdad yase-Algeria koka-Group C ozokuba ngeSonto ngo-21h00 ekuhambeni. IStellenbosch yiyona eqhwakele kuleli qoqo ngamaphuzu amane emidlalweni emibili.