Isexwayiso esishubile kubadlali beSundowns

Umqeqeshi wezitha usonga ukuphoxa iDowns phambi kwabalandeli bayo koweCaf

WAYEYIPHELA endlebeni u-Iqraam Rayners weMamelodi Sundowns ezakhe iSundowns zibhuquzisa iSt Eloi Lupopo yaseCongo ngasekupheleni konyaka odlule.

Mfanafuthi Ndlovu

ISEXWAYISO esishubile kubadlali beMamelodi Sundowns ngaphambi komdlalo ne-Al Hilal yaseSudan kaGroup C kwiCaf Champions League ozokuba ngoLwesihlanu ngo-20h00 eLoftus Stadium, ePretoria. ULaurentiu Reghecampf ongumqeqeshi we-Al-Hilal, uthi iDowns ingalokothi icabange ukuthi izosetshenzelwa wukuba sekhaya kulo mdlalo.

Uthi okwenze batheleka ngoLwesibili kuleli wukuthi bebefuna ukuwulungiselela kahle lo mdlalo, ubafice sebewujwayele umoya wakuleli. Lo mqeqeshi uthi wazi kahle ukuthi lo mdlalo uzokuba nzima kuwona womabili la makilabhu ngoba yiwona asembangweni wokusonga lesi sigaba esesicongweni kuleli qoqo.

NGUMQEQESHI we-Al Hilal yaseSudan.

Le kilabhu ihlezi endaweni yesibili kwi-log kwiGroup C ngamaphuzu amane, isele ngegoli elilodwa kwiDowns ezihola phezulu.

"Sifuna ukuqhubeka nomgqigqo wethu omuhle uma sesibhekene neSundowns. Ngiyazi kahle iSundowns ukuthi inzima, futhi idlala kahle," esho.

UReghecampf uthi uyabethemba abadlali bakhe ukuthi bazokwazi ukuwathola egcwele amaphuzu alo mdlalo.

NGUMQEQESHI weSundowns uMiguel Cardoso.

UMiguel Cardoso oqeqesha iDowns, uthe uzobophela isikimu esiqine kakhulu kulo mdlalo ngenhloso yokuqinisekisa ukuthi wonke amaphuzu alo mdlalo asala eNingizimu Afrika.