IDurban City kayifuni 'ukuyolunguza' kweyeCaf

NGUMPHATHI weDurban City, uFarook Kadodia, enomqeqeshi wakhe, uPitso Dladla.

ISITHOMBE NGABE: BACKPAGEPIX

Mfanafuthi Ndlovu
 
UKHOLWA wukuthi isipiliyoni sokuba sebholeni elikhokhelayo iminyaka ewu-23, yisona esiholele ekutheni iDurban City ibenesizini enhle ka-2025/26 kwiBetway Premiership, uFarook "Ntshebe" Kadodia ongumnikazi wale kilabhu.

IDurban City isemgqeni wokuqeda isizini ikwi-top 8 yize ingomakoti kulesi sigaba, efike kwezwakala kusona njengoba iyizingqwele zeNedbank Cup, emuva kokuguqisa iTS Galaxy kowamanqamu muva nje.

Izodlala kwiCaf Confederation Cup ngesizini ezayo njengoba inqobe iNedbank Cup.

Ukuqinisekisa indawo yayo kwi-top 8, kufanele ithole iphuzu nje vo emdlalweni wayo namaZulu FC, wokusonga iBetway Premiership ngoMgqibelo ngo-15h00 eChatsworth Stadium, eThekwini.

UKadodia ekhuluma neLANGA Lempelasonto, uthe uyohlale ekubonga okwenziwe ngabaqeqeshi bekilabhu nabadlali ekubeni bengomakoti kwiPremiership. Uthe ugculisekile nangendawo abakuyona kwi-log.

"Ngijabulela konke esikuzuze kule sizini. Ngibonga nabo bonke ababambe iqhaza ngezindlela ezahlukene.

"Nesipiliyoni sami sokuba sebholeni iminyaka ewu-23, sisisebenzele, nakuba abaningi bebengasiniki lutho kule  sizini.

"Ngicabanga ukuthi siphumelele ukwakha inqanawe yekilabhu yize imali besingenayo kangakho, kodwa sakwazi ukunqoba imidlalo eminingi ekuhambeni," esho.

NGU-KADODIDA noDladla benomqeqeshi wonozinti kwiDurban City, uRowen Fernandez.

Uthe usazohlala nethimba labaqeqeshi, babheke indlela yokukwazi ukuyoyibamba ishisa kwiCaf Confederation Cup ngesizini ezayo.

"Yiqiniso elimsulwa ukuthi ukuyodlala e-Afrika kuzodinga nemali enkulu. Yingakho kungasijabulisa ukuthi izinkampani zaseNingizimu Afrika zifake isandla ekilabhini," esho.

UKadodia uphonsele inselelo ozakwabo baKwaZulu-Natal ukuqinisa kakhulu kubadlali bakulesi sifundazwe, ukuthuthukisa ibhola laso.