NGUNALEDI Aphiwe.

Lucky Cain

UZOKWANDULELWA ngemicimbi yekhethelo umcimbi waminyaka yonke, Ugu Jazz Festival, okulindeleke ukuba uhehe izinkulungwane zabantu ogwini oluseningizimu neKwaZulu-Natal, ozoba ngomhla ka-(27) kuNhlangulana (June) nonyaka.

Lo mcimbi we-jazz ukhuze ibuya ngonyaka owedlule njengoba usuwenzeka ngaphansi kwedili lemicimbi eyenzeka ngaphansi kwe-Off Ramp Experience, ezoqala kusukela ngomhla ka-25 kuya kumhla ka-27 kuJune kophezulu.

Lo mcimbi - owethulwe ngokusemthethweni ngenyanga eyedlule - ayaqhubeka amalungiselelo awo. Kulindeleke ukuba wandulelwe ngemicimbi eyehlukene yekhethelo, ngaphambi kowe-jazz, okuzobe kuyiwona okubhekwe ukuthi udonse abantu abaqhamuka ezinkalweni ezahlukene nesifundazwe, nakwezinye izindawo.

Uzokwandulelwa ngowesidlo sakusihlwa obizwa nge-Offramp Experience Gala Dinner in Comedy, ozoba ngomhla ka-25 kuJune, oGu Sports And Leisure.

NGUSIMPHIWE Shembe, ongusomahlaya.

Kulo mcimbi kuzobe kuboshelwe osomahlaya abahlukene, okubalwa kubo uSimphiwe Shembe, uSimunye Churchboy, uMondli Mzizi unoNonto R. Kuzobe kunandisa nabaculi okukhona kubo uMondli Ngcobo noZawadi Yamungu.

Kulabo abanothando lokuhambela lo mcimbi ozobe usoGu Sports And Leisure, amathikithi ayatholakala eTicketpro, ePick n Pay, Spar naseBoxer ngo-R250, ajwayelekile noR600 wezicukuthwane.

Ngomhla ka-26, kuzobe kunowe-gospel okuzobe kuboshelwe kuwona uMpumi Mtsweni, uNontokozo Mkhize, uSgwili, uMthokozisi Nkosi, uNkanyiso, iShongwe and Khuphuka, uJumbo, uMelusi Mbokazi nabanye.

Lo mcimbi uzobe uyimvuselelo ehambisana nabefundisi abehlukene.
Amathikithi awo abiza u-R200 no-R600 wezicukuthwane.

NGU-DON Laka, we-jazz.

Kowe-jazz ngomhla ka-27, kuzobe kuboshelwe uDon Laka, uSiphokazi, u-Ernie Smith, uNaledi Aphiwe, uMnqobi Yazo, uMawelele, uDanya, uBongani Nkwanayana, u-Olefied Khetha, uDJ 101, uDJ Muntu uJikeleza, uFanie Dick, uTender uMavundla DJ Mshediz nabanye abaningi.

Umhleli walo mcimbi, uSiya Msomi, uthe inhloso enkulu wukugubha amasiko nenjabulo, nokuqhakambisa ubuhle baseSouth Coast, kanjalo nokufukula umnotho wakule ndawo - egabe kakhulu ngezokuvakasha.

Uthe kuyamthokozisa ukubona isasasa elikhonjiswa ngamaciko nazo zonke izinhlaka ezibasekayo, ngalo mcimbi.

Amathikithi omcimbi we-jazz nawo aseqalile ukutholakala ngo-R250 ajwayelekile, kanti awezicukuthwane uR350 kanti awezitatanyiswa wona abiza R1000.