Uzohlanganisa izingqungqulu zikamasikandi umshado wegidangoma 

 IGIDANGOMA leGcokama Elisha, uTekisi Ntetha, ozoshadelwa nguNkz Nomfundo Mpungose.

Mthobisi Sithole

UZOHLANGANISA izihlabani zikamaskandi ezingahoshelani umshado wegidangoma lesinye sazo.

UTekisi Ntetha ogidela uMthandeni "iGcokama Elisha" Manqele, uzobe eshadelwa nguNkz Nomfundo Mpungose mhla ka-28 kuJuni eDubeni, eMelmoth, kanti noKhuzani "iNdlamlenze" Mpungose kulindeleke ukuba abekhona.

Umshado usuka kwaMpungose, eMandaba, eNkandla egcekeni kubo kaThibela "Ntibane" Mpungose, owaziwa kakhulu eqenjini likaKhuzani. Ngaphambi kokuba uTekisi agidele iGcokama, ubegidela uKhuzani kusukela ekusungulweni kweqembu, wabe eseshiya ngenxa yokungaboni ngaso linye, wajoyina iGcokama.

Exoxa naleli phephandaba uTekisi, uthe kuzobe kuqopheka umlando ngalolu suku ngenxa yokuthi udwendwe lwakhe luyaphoqa ukuba lezi zilomo zikamaskandi, zihlanganyele naye esigcawini.

"Ngisemlandweni omkhulu ngoba igama lami liyavela ekusebenzisaneni nazo zombili lezi zinsizwa ezingamakhosi kamaskandi. Ngizohlanganisa amakhosi ezizwe ngoba inkosi yesizwe sakwaMpungose neyakithi, azobakhona ngenxa yokuthi sizingane zawo," kusho uTekisi.

Uthi isinqumo sokuganwa usithathe emuva kokuba ebone uThibela Mpungose eshadelwa. Uthi bekufanele ayithathe intokazi yakwaMpungose ukuze idede indawo, nenkosikazi kaThibela ikhululeke emzini eganele kuwona.

"Sinesikhathi eside sithandana nentokazi yakwaMpungose, kusukela ngo-2014. Uma abasekhweni lami nabo sebeganwa, ngikhuthazekile nami ukuba ngiyilande ingane yabo ngoba ingenzelile iqiniso iminyaka ngeminyaka, yathembeka kimi," esho.

Uveze ukuthi nakuba esikhiphile isimemo esiqondene noKhuzani ngqo, kodwa vele owesifazane ozoshada usuka egcekeni lakubo kwaMpungose, okuzokwenza ukuba abekhona belethe umakoti.

Uthi lolu dwendwe lungaphezulu kwamandla akhe, ulindele abantu abaningi.

"Izandla zivuliwe kwabafisa ukungiphekisa," esho.
Uthe ufisa ukuhlaba izinkomo eziwu-6, ezintathu usephekiswe ngazo yiGcokama Elisha nezinsizwa eliphila nazo.

UTekisi uthi iGcokama limxhase nangemali
u-R22 000, neziphuzo.

mthobisis@ilanganews.co.za