Siyazishwashwatha

ULUCAS Ribeiro (26) (osesithombeni), odabuka eBrazil, useyicebe kwiFifa iMamelodi Sundowns njengoba efuna ukuba imkhulule kwazise ufunwa yiQatar SC, emugabisela ngemali econsisa amathe.

Kuthiwa iSundowns ifuna itshe lemali ngaye, okuyiyona into emkhalisayo uRibeiro njengoba esekubeke kwacaca ukuthi akasathandi ukuyidlalela.
Lo mdlali usanenkontileka namaSandawana.

AHAMBISA okwamakhekhe ashisayo amathikithi okubuka umdlalo weLamontville Golden Arrows neKaizer Chiefs weBetway Premiership ozokuba ngoMgqibelo ozayo womhla ka-30 kwephezulu ngo-17h30 eMoses Mabhida Stadium, eThekwini.

Amathikithi alo mdlalo aqale ngoLwesine ukudayisa, kanti abiza u-R80.

IChiefs izobe iqala ukuzodlala KwaZulu-Natal ngale sizini - uma ungabalwa umdlalo weToyota Cup ewugijime ne-Asante Kotoko yaseGhana eMoses Mabhida Stadium ngenyanga edlule - njengoba isefomini.

Izogijima lo mdlalo sekukhona umqeqeshi wayo, uNasreddine Nabi (osesithombeni) okulindeleke ukuba atheleke kuleli ngale mpelasonto, njengoba ebeyobheka umkakhe eTunisia olimale enza umsebenzi wasendlini.

KUGQAME ngisho nakunozinti wePirates, uSipho Chaine ukukhathazeka ngesikhathi kuthinteka uThemba Zwane ongukaputeni weDowns.

ISITHOMBE NGABE: BACKPAGEPIX

UMIGUEL Cardoso ocija iMamelodi Sundowns, usekuqinisekisile ukuthi uThemba "Mshishi" Zwane (36) - odlala esiswini - uzohlala izinyanga ezimbili engadlali ngenxa yokulimala.

UZwane udonseke imisipha ngesiwombe sokuqala iDowns ibambana ne-Orlando Pirates ngo-1-1 emlenzeni wokuqala weSemi final yeMTN8 ngeledlule e-Orlando Stadium, eSoweto.

IMAMELODI Sundowns isiqede konke noKhulumani Ndamane (21) (osesithombeni) odlala emuva kwiTS Galaxy njengoba kuvela ukuthi isimusayinise inkontileka yeminyaka emine.

Kuthiwa iDowns izobe isimebolekisa kuyona futhi iGalaxy bese imuholela yona, kodwa-ke ngeke adlale uma iGalaxy ibhekene neDowns.
Lo mdlali usayina kwiDowns nje, ujoyine iGalaxy esuka kwiKaizer Chiefs.

Ulandele uPuso Dithejane - oshaye i-hat trick yokuqala yale sizini yeBetway Premiership ngesikhathi equlela amagoli amathathu iGalaxy ivukela iChippa United esiswini njengotshwala ngoLwesibili, iyinenebula ngo-4-1 koweligi.
IChippa yiyona ibithole kuqala igoli.

UMQEQESHI we-Orlando Pirates u-Abdeslam Ouaddou, usekuqinisekisile ukuthi u-Olisa Ndah (osesithombeni) odlala emuva, obelimele, useqalile ukujima nozakwabo, usengabonakala noma yinini enkundleni.

UNdah sekuphele cishe unyaka engabonakali kwiBucs ngenxa yokulimala.

KUTHIWA iChippa United inkankanya ukulanda uLuc Eymael waseBelgium (osesithombeni) ukuyoyitakula njengoba iphela yinduku kwiBetway Premiership.

IChilli Boyz iqale isizini iholwa nguSinethemba Badela, okuvela ukuthi akazwananga noSinesipho Mali oyi-technical director kule kilabhu.

Kuthiwa ingxabano noMali isukela ekutheni bebengaboni ngaso linye ngohlobo lwabadlali okufanele basayiniswe yile kilabhu, okubalwa kubona uThabiso Kutumela noSomila Ntsundwana.

Kuthiwa ngemuva kwesibhaxu seDurban City sika-1-0, uBadela uthathe imigodla waphuma efulethini ebelikhokhelwa yiChippa.

Emdlalweni neTS Galaxy, izintambo beziphethwe nguMusa Nyatama le kilabhu itaxwa ngo-4-1.