ULarsen ulanda abadlali abanesipiliyoni kwiVenda FC

NGU-CLINTON Larsen ongumqeqeshi weVenda FC.

ISITHOMBE NGABE: BACKPAGEPIX

Mfanafuthi Ndlovu

ULANDE abadlali abanesipiliyoni uClinton Larsen ongumqeqeshi weVenda FC egijima kwiMotsepe Foundation Championship (MFC).

Le kilabhu izoqala isizini entsha ka-2025/26 seyihlome ngoMotebang Sera, uThato Lingwati - bobabili abagcine ukubonakala kwiRoyal AM engasekho kunobhutshuzwayo waseNingizimu Afrika, emuva kokuxoshwa kwiPremier Soccer League (PSL) ngesizini edlule - uMalcolm Jacobs owake wavimbela iRichards Bay FC, uMatome Makobela owake waba semabhukwini eChippa United, uGregory Damons owake wagijima kwiMoroka Swallows, uSibongiseni Ngcobo, uChris Matombo, uDeolin Mekoa owake wadlala kwiMagesi FC, u-Anathi Ngwandla, uSabulela Ntombela, uRendani Ramakgapola, uJoseph Mazibuko no-Unariṋe Kudzingana.

Ethimbeni labaqeqeshi, uLarsen uzolekelelwa nguSolly Luvhengo no-Olivier Kouadio ozocija onozinti.

UMOTEBANG Sera (okwesokudla) wodumo kwiRoyal AM, ungomunye wabadlali abanesipiliyoni abasayiniswe yiVenda.

ISITHOMBE NGABE: BACKPAGEPIX

ULarsen unesipiliyoni sokuqeqesha kulesi sigaba njengoba ehole iMagesi FC yenyukela kwiBetway Premiership ngokuqala kwesizini edlule ka-2024/25. Nokho iMagesi isheshe yamchitha ngenxa yokungenzi kahle kwiligi, yize ayinqobela iCarling Knockout Cup.

IVenda izovula isizini ngokubhekana neCape Town City ngoMgqibelo ngo-15h00 e-Athlone Stadium, eKapa.
Kuvela eleCity nje, yeshela uKeagan Dolly osanda kuhlukana neTS Galaxy.

IBlack Leopards - ecijwa nguJoel Masutha - isayinise uSmiso Ndlela osuka kwiKruger United, uSamkelo Sithole obekwiSummerfield Dynamos noZukile Mkhize obedlalela iRoyal AM.

Isiyonke imidlalo yokuvula iMFC imi kanje:-
NGOLWESIHLANU
E-TUT Stadium: Gomora United vs Leicesterford City 15h00.
EGelvandale Stadium: Highbury FC vs University of Pretoria 15h00.
NGOMGQIBELO
EThohoyandou: Black Leopards vs Casric Stars 15h00.
E-Athlone: Cape Town City vs Venda FC 15h00.
EChatsworth Stadium: Milford FC vs Lerumo Lions 15h00.
EMxolisi Dicksy: Upington City vs Kruger United 15h00.
NGESONTO
EHarry Gwala: Midlands Wanderers vs Hungry Lions 15h00.
KaNyamazane: The Bees vs Baroka FC 15h00.