Ezifingqiwe

IMIBIKO yakamuva iveza ukuthi usebuyiselwe emsebenzini uGeneral Dumisani Khumalo (osesithombeni esingenhla), ohola uphiko lweCrime Intelligence.

Ngokubika kwe-EWN, uKhumalo ubuyiselwe ngoLwesine ekuseni emsebenzini wakhe, ngemuva kokumiswa kusukela ngoJune nonyaka.

UKhumalo wamiswa nabanye abayisithupha ngezinsolo zenkohlakalo nokukhwabanisa mayelana nokuqashwa kowesifazane, uDineo Mokwele.

Kuqashwe amaphoyisa ukuqapha izindawo ezahlukene eNingizimu Afrika njengoba kuzoba neG20

ANGAPHEZULU kuka-3500 amaphoyisa amasha, asanda kuqashwa ajutshwe ukuqapha ezindaweni ezahlukene eNingizimu Afrika, njengoba kulindeleke ukuba kuqale ukutheleka kwabaholi abazothamela ingqungquthela yamazwe i-G20 Summit, eNasrec, eGoli, kule mpelasonto.

ULt-Gen Tebello Mosikili, ohola uphiko oluhlanganise olweNational Joint and Intelligence Structure, uthi amaphoyisa ami ngomumo ukuqapha nokuqinisekisa ukuphepha kwabo bonke abazobe behambela le ngqungquthela.

NGUMNU Brown Mogotsi.

UQHUBEKILE nokumangaza ngobufakazi bakhe uMnu Brown Mogotsi, ngesikhathi evele kwiKhomishini kaMadlanga ngoLwesine.

UMogotsi uqale ngokudida ngonyaka azalwa ngawo kule khomishini. Ebufakazini bakhe kuvele ukuthi wazalwa ngo-1979, kodwa ngesikhathi esephekwa ngemibuzo, waveza ukuthi empeleni wazalwa ngo-1977.

Usole uMnyango wezaseKhaya ngaleli phutha. Uphinde waveza ukuthi akasiqedanga isikole njengoba engawuphothulanga umatikuletsheni, waphinde waveza nokuthi akanazo iziqu ezihambisana nobunhloli, kodwa likhona ikilasi alingena lokufundela ubunhloli.

NgoLwesithathu ummeli obemhola ngemibuzo uMatthew Chaskalson, wamsola ngokuqamba amanga nokwethula ubufakazi obungenasisekelo.

KONKE sekumi ngomumo ngomcimbi waminyaka yonke wokuklomelisa abasemkhakheni we-gospel, obizwa ngeCrown Gospel Awards, ozoba ngeSonto eNkosi Albert Luthuli International Convention Centre, eThekwini.

Lo mcimbi ukhuza ibuya eThekwini ngemuva kweminyaka emibili wenzelwa eGoli.
Ngonyaka owedlule kushone umsunguli wawo, uNkk Zanele LaMbokazi Nkambule.

Kulindeleke ukuthi kuklonyeliswe abaculi abenze kahle kulesi sikhathi esingangonyaka esedlule.

UMmatema Moremi (osesithombeni esingenhla), owazakhela udumo emncintiswaneni we-Idols, uzobe engomunye wabethuli bohlelo kulo mcimbi.