NGABADLALI beChiefs bezivocavoca.

ISITHOMBE NGABE: BACKPAGEPIX

Zakhele Mchunu

SELIVUKE kabusha iphupho leKaizer Chiefs lokubuyela kwiCaf Confederation Cup nangesizini ezayo njengoba iphume ngosuku lokugcina esigabeni samaqoqo kule sizini isuswa esicongweni ikade iqhwakele.

IChiefs izogadulisana neMagesi FC koweBetway Premiership ngoMgqibelo ngo-18h00 eMoses Mabhida Stadium, eThekwini.

Izokuya kulo mdlalo inolukhulu ugqozi emuva kokuqeda ishobolo lokwehlulwa emidlalweni emine ilandelana ngesikhathi iguqisa iDurban City ngo-1-0 ngeledlule eGoli.

Lo mphumela wenze AmaKhosi abuyelwa wukuzethemba njengoba evunwa yizibalo ukuqeda endaweni yesithathu uma ezokwazi ukugcina umgqigqo.

Okuwafaka ugqozi nakakhulu wukuthi asele ngemidlalo emibili emakilabhini angaphezulu kwawo njengoba esagijime ewu-19 ekubeni amaningi asedlale ewu-21 kubalwa nawo wonke angenhla kwawo.

NGUSIBONGISENI Mthethwa ongenye yezinjini zeChiefs.

ISITHOMBE NGABE: BACKPAGEPIX

Okunye okuwaqinisa idolo wukuthi azogijima neMagesi sekubuye uSibongiseni "Ox" Mthethwa odlala esiswini no-Aden McCarthy oyisitobha bobabili abebengekho ngeledlule njengoba bebedonsa izigwebo zamakhadi aphuzi abawathola ezabo ziguqiswa yiRichards Bay FC ngo-1-0 muva nje eMhlathuze Sports Complex.

IChiefs inqobe iDurban City nje, abalandeli bayo bebengeneme ngodaka lwayo lwakamuva, okwenze uMduduzi "Mdu or Die" Shabalala (22) odlala esiswini eziMpofaneni, wabacela ukungapheli amandla, baqhubeke nokubeseka, ukubafaka umdlandla wokwenza okungaphezulu emidlalweni.

"Siyabacela abalandeli bethu ukuphuma ngobuningi babo ukuzoseseka. Siyakuqoda ukuthi ikilabhu ibhekene nesimo esinzima kodwa njengamanje yilapho esidingana khona sonke ukubambisana, ukuphuma kule nto," kusho uShabalala.

Isiyonke imidlalo yeBetway Premiership engempelasonto iqhathwe kanje:
NGOMGQIBELO
E-Old Peter Mokaba: Polokwane City vs AmaZulu 15h30.
E-Athlone: Stellenbosch vs Chippa United 15h30.
EMoses Mabhida Stadium: Kaizer Chiefs vs Magesi 18h00.
NGESONTO
EFree State Toyota Stadium: Siwelele vs Orbit College 15h30.
EKing Zwelithini: Golden Arrows vs Sekhukhune United 15h30.
EMbombela Stadium: TS Galaxy vs Orlando Pirates 15h30.
EChatsworth Stadium: Durban City vs Richards Bay 17h30.

I-KAIZER Chiefs ibambisene neLANGA baphisana ngamathikithi ahamba ngamabili kubafundi abawu-20 abanenhlanhla okubuka umdlalo neMagesi FC weBetway Premiership ongoMgqibelo ngo-18h00 eMoses Mabhida Stadium, eThekwini.

Ukuzibeka ethubeni shayela ku: 0815858684 ngoLwesihlanu ngo-09h00 kuya ku-09h10 ekuseni, uphendule lo mbuzo olula.

Ngobani abaphisana ngala mathikithi? Niyacelwa ukuba ningashayi ngaphambi nangemuva kwesikhathi esibekiwe.