NGABADLALI beMilford FC bejabula emuva kokukhipha iSekhukhune United kwiNedbank Cup.

ISITHOMBE NGABE: BACKPAGEPIX

Mfanafuthi Ndlovu

IGQUGQUZELWA nawukuhamba ibanga elide kwiNedbank Cup iMilford FC esembangweni oshubile wokunqoba isicoco seMotsepe Foundation Championship (MFC) ngale sizini ka-2025/26, ukuze inyukele kwiBetway Premiership ngezayo ka-2026/27.

IMilford isethubeni lokungena emlandweni ngokudlulela kowamanqamu weNedbank Cup. Iqhathwe neTS Galaxy kwi-semi final yalo mqhudelwano, kanti kwenye i-semi final kuzodlala iDurban City neCasric Stars.

Bobabili iMilford neCasric, badlala kwiMFC futhi basembangweni wesicoco.

Ukubuyela odabeni lwemidlalo yeMFC, umnikazi weMilford, uDkt Xanti Pupuma - futhi ongumqeqeshi wale kilabhu - ukholwa wukuthi uhambo lwabo oluhle kwiNedbank yilona kanye oluzobenza bakwazi ukuyibamba ishisa nakwiMFC njengoba begudluze ngisho namakilabhu agijima kwiPremiership endleleni ebheke kumaSemi final eNedbank.

Bawashise ijezi iSekhukhune United kuma-quarter final.
ISekhukhune ingenye yamakilabhu angabhenywa kwiPremiership.

NGUMENZI Chili ongenye yezinsika zeMilford FC.

ISITHOMBE NGABE: BACKPAGEPIX

IMilford izobhekana neBaroka FC koweMFC ongoMgqibelo ngo-15h30 eMhlathuze Sports Complex, eRichards Bay.

UPupuma uthe: "Ukuba yingxenye yamaSemi final eNedbank kubakhuthaza kakhulu abadlali bami.

"Bonke abadlali bafuna ukuba yingxenye yayo yonke imidlalo ephambi kwethu. Sinethuba elihle lokugeza izinhliziyo zabalandeli abaphoxekile ngesikhathi sihlulwa yiKruger United ngo-1-0 koweligi ngeledlule ekuhambeni.

"Ukuguqa kwethu kushiye isilonda esikhulu ngenxa yokuthi onondweba kabazange basiphathe kahle.

"Sinxusa abalandeli ukufika ngobuningi ukuzoseseka njengoba behlale benza uma sisekhaya nasekuhambeni." 

UMenzi "Deco" Chili ongomunye wezinsika zeMilford, uthi okuzokwenza ukuba lo mdlalo ubenzima wukuthi iBaroka FC ilwela ukuqhela ezembeni.

* I-Upington City ishaye iLerumo Lions ngo-2-0 koweMFC ngoLwesithathu eDobsonville Stadium, okwenze yaxaxama kancane kwi-log njengoba seyinamaphuzu awu-32 emidlalweni ewu-21.

Isiwunombolo 6, isuka ku-7 osekuhleli kuwona i-University of Pretoria.

Isiyonke imidlalo yeMFC engempelasonto ihlelwe kanje:-
NGOLWESIHLANU
EGelvandale: Highbury FC vs Black Leopards 15h30.
ESolomon: Casric Stars vs Kruger United 15h30.
NGOMGQIBELO
EThohoyandou: Venda FC vs Cape Town City 15h30.
EDobsonville: Leicesterford City vs Gomora United 15h30.
EMhlathuze Sports Complex: Milford FC vs Baroka FC 15h30.
NGESONTO
EMxolisi Dicky: Hungry Lions vs Midlands Wanderers 15h30.
KaNyamazane: The Bees vs University of Pretoria 15h30.