'Ubuyela Okhozini FM' uNongcebo Mckenzie

NGUNONGCEBO Mckenzie

Mthobisi Sithole

LITHATHE osemsamo lambeka emnyango, lathatha osemnyango lambeka emsamo ngezinguquko zomsakazo uKhozi FM, zakulo nyaka.

ILANGA Lempelasonto lithole ngemithombo yalo ukuthi kunezinsolo eziqinile zokukhuza ibuya
kukaNongcebo Mackenzie kulo msakazo, njengoba ayechithwe kulesi siteshi eminyakeni emibili edlule, ngenxa yokungaboni ngaso linye nabaphathi bomsakazo, bangaleso sikhathi.

Kuthiwa uzokwenza izinhlelo zasebusuku.

USipho "Sgqemeza" Mbatha (osesithombeni esingenhla), noLucky Nkosi, bangabanye babasakazi okuvela ukuthi abasabuyi.

UDudu "Lady D " Khoza obesakaza kusukela ngoMsombuluko kuya kuLwesihlanu uhlelo uJabule uJule, njalo phakathi kuka-9 ekuseni kuya ku-12 emini, uncishelwe yizinsuku, ngeke esasebenza isonto lonke njengoba bekwenzeka.

Kunemibiko ethi bakhona nabasakazi abasha, abazolandwa kwezinye iziteshi zomphakathi, bajoyine uKhozi FM, okubalwa kubona uVee Mthembu (osesithombeni esingezansi), obesebenza kwiJozi FM, eGoli.

ILANGA Lempelasonto lihoshe nokuthi omunye wabadidiyeli bezinhlelo esebehlale isikhathi eside kulo msakazo, uSphongo Dladla, udliwe yizembe.

Ukungavuselelwa kwenkontileka kaNongcebo, kwenzeke ngo-2024, kwakhalisa abaningi naye uqobo, ngesikhathi evalelisa, ethi akalazi icala lakhe.

Ubudlelwano bakhe nabaphathi besiteshi bangaleso sikhathi, bonakale ngenxa yokuthi bekubangwa umsebenzi, esolwa ngokuthi akasawuhloniphi, umatasa nemisebenzi eseceleni- kanti nemihlangano yesiteshi yokubonisana ngezinhlelo zokuthuthukiswa kwaso, kuthiwa wayengasabonakali kuyona.

Ngesikhathi esebenza oKhozini uNongcebo, ubetohoza nasenyuvesi yaKwaZulu-Natal, efundisa. Ukuxoshwa kwakhe, kumenze ukuba aqinise ebhizinisini lakhe lokudayisa amaqanda, wavula nenkundla yakhe yezokuxhumana, iPodcast.

Lo msakazo kubukeka ubabuyisa kancane kancane abaxoshwe kuwona eminyakeni edlule, njengoba nyakenye ubuyise noSthandwa Nzuza, naye owayechithiwe, yangavuselelwa inkontileka.
mthobisis@ilanganews.co.za