Izovela namuhla enkantolo imeya yaseMhlathuze

UNGWEZI UZINIKELE EMAPHOYISENI NGEMUVA KOKUZWA UKUTHI UVULELWE ICALA...

Ivulelwe icala ngusomabhizinisi ongusonkontileka kumasipala...

Thandoluhle Ngubo

KULINDELEKE ukuba ivele namuhla ngoLwesihlanu eNkantolo yeMantshi yaseRichards' Bay, iMeya kamasipala waseMhlathuze uMnu Xolani Ngwezi, evulelwe icala lokwehlisa isithunzi ngusomabhizinisi ongusonkontileka kulo masipala.

Ngokuthola kwaleli phephandaba, uNgwezi uziyele emaphoyiseni ngoLwesithathu ngemuva kokuzwa ukuthi kunecala avulelwe lona yilo somabhizinisi. Ube esededelwa, wayalelwa ukuba avele enkantolo ngoLwesihlanu.

Imibiko iveza ukuthi lo somabhizinisi usola uNgwezi ngokuqamba amanga nokumehlisa isithunzi ngesikhathi enengxoxo nesinye isiteshi sezindaba ngasekuqaleni kwalo nyaka. Kuthiwa le ngxoxo yalandela ukuvela kwezinsolo zokuthi uNgwezi wampintshela ekhoneni lo somabhizinisi, wafuna ngenkani intshontsho ukuze aqhubeke nokuhlomula ngamathenda kulo masipala.

Ihhovisi likaMnu Tobias Gumede ongusomlomo womkhandlu eMhlathuze, likuqinisekisile ukuthi likhona icala elivulelwe imeya, kodwa lathi kayikaze iboshwe.

Okhulumela amaphoyisa KwaZulu-Natal uCol Robert Netshiunda, ukuqinisekisile ukuvulwa kwecala.

"Emaphoyiseni ase-Richard's Bay kuvulelwe owesilisa oneminyaka ewu-41, icala lokuthunaza isithunzi somunye umuntu. Izinsolo zithi umsolwa wakhuluma okungelona iqiniso ngommangali kwenye yezingxoxo ayenayo esidlangaleni. Umsolwa uzovela enkantolo ngoLwesihlanu mhlaka 20 June nonyaka," kuphetha uNetshiunda.