Mzwamandla Zondi

ITHUBA lokugcina kubasubathi abangakazenzi izikhathi zokungenela iComrades Marathon yanonyaka ezokuba mhla ka-8 kuJune, isukela eMgungundlovu isongwe eThekwini.

Umjaho wanonyaka ngowesi-98, kanti kuyavalwa ngoMsombuluko ukuthumela imininingwane yokuwungenela.

Ngokombiko weComrades Marathon Association (CMA), abasubathi kufanele kushone elangoMsombuluko sebethumele yonke imininingwane yabo ukuze bakwazi ukuba yingxenye yalo mjaho omkhulukazi emhlabeni.

Umjaho wanonyaka ungenelwe ngabasubathi abawu-24 000. Kuthiwa zibuyile zombili izingqwele zawo zanyakenye, uPiet Wiersma noGerda Steyn. 

Imininingwane abasubathi okufanele bayithumele kwaComrades ngaphambi kokuba kuvalwe, yizikhathi abazenzile ukuze kuhlelwe indawo abazokuma kuyona, ilayisensi ka-2025, yimininingwane ngempilo yabo nomuntu ongathintwa uma kwenzeka umsubathi eba nenkinga ngosuku lo mjaho.

NGU-GERDA Steyn ophethe isicoco seComrades Marathon kwabesifazane.

ISITHOMBE NGABE: BACKPAGEPIX

Abasubathi abangakazenzi izikhathi - abafuna ukwenza ngcono izikhathi zabo - basenalo ithuba njengoba ithe chithi saka imijaho yokugcina yokwenza izikhathi zeComrades.

Abasubathi baseThekwini bazokhiphana inkani kwiDurban International Marathon ezokuba ngeSonto, isukela eSiphingo isongwe eMoses Mabhida People's Park, eThekwini.

USteve Mkasi weDurban International Marathon, uthi sebemi ngomumo ukwamukela abasubathi abazokuba yingxenye yalo mjaho. Uthi lo mjaho uzokube uyingxenye yeCAA Championships, okuhlanganisa nabasubathi abaphuma emazweni angomakhelwane.

Abasubathi bayaziswa ukuthi izinombolo zizolandwa eSuncoast ngoLwesihlanu nangoMgqibelo.

Omunye umjaho okhona, yiLemo Mall Mangaung Marathon ezokuba seFree State lapho uNkosikhona Mhlakwana eyinxusa lawo. Nawo ngowokuzibekisela indawo kwiComrades.
Imininingwane yeComrades itholakala ku-www.comrades.com.