KUSUKA kwesobunxele; ngu-Amad Diallo (we-Ivory Coast), nguJude Bellingham noHarry Kane (England), nguCristiano Ronaldo (ocambalele - Portugal), nguCaleb Yirenkyi (Ghana), Lionel Messi (Argentina) no-Erling Haaland (Norway).

ISITHOMBE NGABE: BACKPAGEPIX

Mthokozisi Dlomo

NGOLWESINE singene emidlalweni yesibili yamaqoqo, ngemuva kokuba eyokuqala isikhombisile ukuthi mkhulu umlando osazoqopheka emqhudelwaneni weNdebe yoMhlaba yeFifa oqhubekayo eMexico, eCanada nase-USA.

Miningi imidlalo eshiye amaphanta ebambe amakhanda, ofishi abancane bekhombisa ukuthi bayakwazi ukubhukuda esizibeni esisodwa nabakhulu.
 
* Avule kanjani amazwe ase-Afrika?

Mabili kuphela amaqembu anqobe imidlalo yawo yokuvula, kulawa awu-10 amele i-Afrika kulo mqhudelwano.

IGhana iguqise iPanama ngo-1-0 wegoli likaCaleb Yirenkyi umdlalo usuyophela, entathakusa yayizolo kanti neCote d'Ivoire iguqise i-Ecuador ngo-1-0 wegoli lika-Amad Diallo - naye ulishaye umdlalo ususemuseni kanompempe.

Nakuba amawini kuyinto abelishalazela leli zwekazi, kunamaqembu adlale kahle, akhombisa ukuthi ibhola lase-Afrika kumele lihlonishwe emhlabeni.

 Ngubani oyoke akhohlwe umhlaba wonke ubuka iCape Verde ibamba iSpain ngo-0-0, iDR Congo ishikilisa iPortugal ngo-1-1, neMorocco ibuya iphila kwiBrazil kuba ngu-1-1.

NGU-KYLIAN Mbappe weFrance ehlanganyelwa ngabadlali beSenegal.

ISITHOMBE NGABE: BACKPAGEPIX

Ilanyulelwe yisipiliyoni iFrance, isho ukuyidla luhlaza iSenegal, nakuba umdlalo ugcine uphele ngo-3-1.

Ingxenye enkulu yomdlalo, iLions of Teranga ibingaphezulu komdlalo, yakha amathuba amahle kodwa yangawasebenzisa ngesiwombe sokuqala.

Sekuqalile ukuqagela ngomshayimagoli ozovelela

Uvele washisa zisasuka amadaka umbango womshayimagoli.

Umdlali we-Argentina uLionel Messi, ogijima indebe yomhlaba yesithupha, ukhombisile ukuthi usekude ukuphelelwa wushatini njengoba evule nge-hat-trick beguqisa i-Algeria ngo-3-0.

Kubhekwe ukuthi alephule kalula irekhodi lokushaya amagoli amaningi (16) kwindebe yomhlaba, njengoba esevele eselificile.

Nangu noKylian Mbappe weFrance, usaqhubeka nokuthwala izwe lakhe njengoba wenza nakwiNdebe yoMhlaba (ngo-2022) edlule, lapho baguqiswa khona yi-Argentina emaphenathini.

UHarry Kane wase-England, ukhombisile ukuthi akayile ukuyosinisa amahleza kulo mqhudelwano njengoba eshaye amagoli amabili, behlula iCroatia - ebeyingazibekile phansi - ngo-4-2.

Ufike kwezwakala umshini wamagoli waseNorway, u-Erling Haaland, obegijima okokuqala lo mqhudelwano, ebingelela ngamagoli amabili bedla i-Iraq ngo-4-1.

Kubukeka bezovaleka imilomo abebekhala ngokwandiswa kwamaqembu kulo mqhudelwano (esuswa ku-32 eyiswa ku-48) nokusala ngaphandle kwezintandokazi zamazwe anjenge-Italy.

Fasa ibhande, isihleli ku-fast lane iFifa World Cup 2026.