NGUTEBOHO Mokoena oshayele iBafana igoli lokuqala kwiNdebe yoMhlaba yeFifa eqhubeka e-USA, eCanada naseMexico.

ISITHOMBE NGABE: BACKPAGEPIX

Zakhele Mchunu
 
IBAFANA Bafana ilithole sekuvalwe amehlo ithuba lokugcina lokuzama ukudlulela kwiLast 32 yeNdebe yoMhlaba yeFifa ibambana neCzechia ngo-1-1, seliyoshona, emdlalweni wesibili ka-group A izolo ngoLwesine ebusuku e-Atlanta Stadium, e-United States of America (USA).

ICzechia yiyona ebone kuqala imbobo yamapali uMichal Sadilek elibeka enethini ngomzuzu ka-6, kodwa igoli lakhe labulawa yiphenathi eqotshelwe ezintanjeni nguTeboho Mokoena ngomzuzu ka-83.

UMokoena ngeke adlale uma iBafana seyigijima umdlalo wokugcina wamaqoqo neSouth Korea ngoLwesine oluzayo lomhla ka-25 ngo-03h00 ekuseni ngenxa yokuba namakhadi amabili aphuzi, asewathole  kulo mqhudelwano.

IBafana - yize likhona ithuba lokudlulela phambili uma ilale endaweni yesithathu, yize lingaqisekisiwe kwazise kudlula onombolo 3 abanamaphuzu angcono - kufanele ilwele ukuwunqoba kumnyama kubomvu lo mdlalo weSouth Korea ukuzibeka ethubeni eliqinile lokudlulela esigabeni somkhumulajezi. 

Yiyona ebambe ibhuleki kwi-group A. Inephuzu, kanti ingenelwe ngamagoli amathathu, yashaya elilodwa.

ICzechia ibambe indawo yesithathu ngephuzu, amagoli amabili ewashayile, yangenelwa ngamathathu.

Kulo mdlalo uHugo Broos ongumqeqeshi weBafana, uqale ngeqembu obekubonakala ukuthi uhlose ukuthola amagoli kulona, kungefani nasemdlalweni neMexico lapho avele wasebenzisa abadlali abaningi basemuva kuwona, kucaca ukuthi ufuna ukuyopaka ibhasi emuva.

IBafana yadliwa ngo-2-0 koweMexico.

NGUTHAPELO Maseko weBafana obe ngumvusi wenyamazane, "ebambisa" indoda ibhola ebhokisini.

ISITHOMBE NGABE: BACKPAGEPIX

Empeleni iBafana ibingawunqoba umdlalo weCzechia ukuba abadlali bayo bebengalibali wukucucuza uma sebephambi kwamapali, njengoba bebevele bavukwe ngamangongwane, ibhola ligcine selithathwe kalula yizitha, ikakhulukazi ngesiwombe sokuqala.

Nokho sekuzophela umdlalo, ibisiphungwa ngezithebe, kucaca ukuthi iwafuna ephelele amaphuzu.

Bekubhoke kakhulu abadlali abangene ngesiwombe sesibili; okubalwa kubona uRelebohile Mofokeng, uKamogelo Sebelebele no-Evidence Makgopa, abafike bahlangana kahle noKhuliso Mudau, u-Aubrey Modiba no-Oswin Appollis.

IBafana kayikaze idlulele esigabeni somkhumulajezi selokhu yaqala ungena kulo mqhudelwano njengoba ihlale iphuma ekuseni; kusuka eFrance ngo-1998, eKorea/ Japan ngo-2002 naseNingizimu Afrika ngo-2010 - njengoba yayingosokhaya.

* Imidlalo yeNdebe yoMhlaba ezogijinywa ukusuka ngoLwesihlanu ebusuku kuze kube yiSonto imi kanjena:- 
NGOLWESIHLANU
United States vs Australia 21:00.
NGOMGQIBELO
Scotland vs Morocco 24:00.
Brazil vs Haiti 02:30.
Türkiye vs Paraguay 05:00.
Netherlands vs Sweden 19:00.
Germany vs Cote d'Ivoire 22:00.
NGESONTO
Ecuador vs Curacao 02:00.
Tunisia vs Japan 06:00.
Spain vs Saudi Arabia 18:00
Belgium vs Iran 21:00.