Akucaci ngekusasa likaMcCarthy kwiChiefs

Mfanafuthi Ndlovu

AKUCACI ngekusasa lesiqongqwane seKaizer Chiefs, u-Aden McCarthy (22), okuvela ukuthi singase sijoyine amanye amakilabhu uma izingxoxo nezikhulu zaseNaturena zingafiki ovuthondabeni.

ILANGA Lempelasonto lithole ukuthi lo mdlali nekilabhu sekunesikhathi eside bengavumelani ngeholo afisa ukugoduka nalo.

Sekuwumlando ukuthi uMcCarthy ukhuliswe yiyo iChiefs, wadlala eqenjini lenjejane yayo eligijima kwiDDC, ngaphambi kokuba imenyusele esigabeni esiphezulu, wafika wadlala kahle.

Lo mdlali uyindodana yenkakha yeziMpofana uFabian McCarthy, nayo eyayiyibamba emuva ngezikhathi zayo.

Kuthiwa okwenza isimo sakhe sibe nzima nakakhulu, wukuthi ekulimaleni kukaRushwin Dortley, kwakunethemba lokuthi uMcCarthy uzokwazi ukusheshe angene khaxa eqenjini elikhulu, njengoba manje esezibona ethwele kanzima ukuqala imidlalo kwiBetway Premiership nakwiCaf Confederation Cup.

NGU-FAWAAZ Basadien olizwa ngendaba ijezi kwiDowns.

ISITHOMBE NGABE: BACKPAGEPIX

Umthombo waleli phephandaba ulipotshozele ukuthi akhona amakilabhu aphesheya kwezilwandle aseqalile ukukhokhobela lo mdlali, ngenhloso yokuthi awajoyine uma kusongwa isizini ka-2025/26.

* Omunye umdlali ongase alifulathele elakuleli, aye phesheya kwezilwandle, nguFawaaz Basadien ofike nedumela kwiMamelodi Sundowns, kodwa olizwa ngendaba ijezi selokhu ejoyine le kilabhu esuka kwiStellenbosch FC, ngaphambi kokuqala kwesizini.

UBasadien kuvela ukuthi angase athathwe yiRaja Club Athletic yaseMorocco, ephekwa nguFadlu Davids wodumo kwiMaritzburg United ne-Orlando Pirates.

Kuthiwa uDavids umfuna uthuli lo mdlali kwazise uyakholelwa kuyena.

* ULesiba Nku ufunwa uthuli yiMarumo Gallants kwazise wake wayibamba kuyona ngaphambi kokujoyina iDowns, yamchitha wajoyina iStellies, nayo okuthiwa ifuna ukumdedela.

* UWayde Jooste ugcine ejoyine iStellenbosch ngemuva kokwehlukana noMzinto United ogijima kwiSafa KZN ABC Motsepe League.

UJooste ugcine ukubonakala esigabeni esiphakeme egijima kumaZulu FC, awajoyine ngemuva kokuchithwa yi-Orlando Pirates.