Uqine idolo uMengameli weSafa ngeBafana

NGUMQEQESHI weBafana Bafana, uHugo Broos enoMengameli weSafa, uDanny Jordaan.

ISITHOMBE NGABE: BACKPAGEPIX

Mfanafuthi Ndlovu

UQINE idolo uMengameli weSouth African Football Association (Safa), uDanny Jordaan ngamathuba eBafana Bafana okujabulisa isizwe kwi-Africa Cup of Nations (Afcon) ezoqala ngeSonto isongwe ngomhla ka-18 kuJanuary eMorocco.

Ekhuluma neLANGA Lempelasonto eseQatar, uJordaan uthe uyasethemba isikwati sikaHugo Broos, ongumqeqeshi weBafana, ukuthi sizohamba ibanga elide kulo mqhudelwano ovikelwa yi-Ivory Coast, eyawunqoba ingosokhaya ngasekuqaleni kuka-2024.

Uthe yize engakwazanga ukubuka iBafana igadulisana neGhana B, eyehlule ngo-1-0 wegoli likaSipho Mbule ngoLwesibili eDobsonville Stadium, eSoweto, kodwa uyazi ukuthi leli qembu lihambe nezibusiso zabantu baseNingizimu Afrika, abebejabule ngalo.

Uthe uzohlangana naleli qembu ngaphambi komdlalo walo ne-Angola wokuvula ka-group B, ozokuba ngoMsombuluko ngo-19h00.

Uthe okumjabulisayo wukuthi uBroos unesikwati osekunesikhathi eside esibumba kahle, okwenza abadlali baso bazane kahle.

NGU-OSWIN Appollis nozakwabo u-Evidence Makgopa bejabula, bebona ibhola liyokhalakathela enethini.

ISITHOMBE NGABE: BACKPAGEPIX

Emdlalweni wesibili wamaqoqo, iBafana izobhekana ne-Egypt ngoLwesihlanu lomhla ka-26, ngaphambi kokusonga imidlalo yamaqoqo ngokushukana neZimbabwe ngoMsombuluko womhla ka-29 kuDecember.

Yize leli qembu belinokwesaba ngo-Oswin Appollis othintekile libhekene neGhana, kepha amathemba abuyile kuvela izindaba zokuthi ukulungele ukuyobamba iqhaza kwi-Afcon.

Lo mdlali akabhenywa selokhu ejoyine i-Orlando Pirates ngasekuqaleni kwale sizini.