07 | Izindaba
Friday, 18 July 2025
Iyolala ibonene
koweSimon Mabhunu Sabela Awards
Lo mcimbi usuwenzeka okwesi-11 kusukela wasungulwa
Kulindeleke osaziwayo, yizicukuthwane zamazinga ahlukene osomabhizinisi, abakhiqizi nabadidiyeli bamafilimu
Yingxenye yosaziwayo abazobonakala emcimbini iSimon Mabhunu Sabela KZN Film and Television Awards ezoba seNkosi Albert Luthuli International Convention Centre, ngoMgqibelo.
Lucky Cain
KONKE sekumi ngomumo ngomcimbi wokuklomelisa abasemkhakheni wezikamabonakude namafilimu KwaZulu-Natal, obizwa ngeSimon Mabhunu Sabela KZN Film and Television Awards, ozokwenzelwa eNkosi Albert Luthuli International Convention Centre, ngoMgqibelo.
Ngalo mcimbi kuhloswe ukuklomelisa abalingisi bamafilimu abawumsinsi wokuzimilela kulesi sifundazwe amafilimu, nemidlalo kamabonakude eqoshelwa KwaZulu-Natal.
Kulo nyaka kugujwa iminyaka ewu-11 wasungulwa lo mcimbi oneminxa engaphezulu kwewu-30, okubhekwe amaciko ahlomule kuyona.
UMnu Sibusiso Gumbi oyisikhulu esiphezulu seKZN Tourism And Film Authority, okuyiyona eyengamele lo mcimbi, uthe okuhle ngawo wukuthi wenzeka ngenyanga eseyethiwa eleFilm Month, njengoba iminingi neminye imicimbi ehambisana nalo mkhakha eyenzekayo kuyona le nyanga.
UGumbi uthe iKZN Tourism And Film Authority izibophezele ekuthuthukiseni abasemkhakheni wezikamabonakude namafilimu ngezindlela ezahlukene okubalwa uqeqesho noxhaso ukuqhakambisa imisebenzi yabo ebalazweni lomhlaba.
Uthe lo mkhakha udlala indima emqoka ekwakheni amathuba emisebenzi nokuthuthukisa umnotho wesifundazwe ngezindlela ezahlukene. Uthi uphinde ukhangise ngobuhle besifundazwe nangosiko mpilo lwabantu bakusona, okwenza umkhakha wezokuvakasha usimame.
Umcimbi wangoMgqibelo kulindeleke ukuthi uhanjelwe yizicukuthwane zamazinga ahlukene okubalwa kuzo izikhulu zikahulumeni, osomabhizinisi, abakhiqizi nabadidiyeli bamafilimu.
Phakathi kweminxa ebhekiwe kubalwa oweBest Actor TV okuncintisana kuwona uHerald Khumalo, uKwenzokuhle Ngcobo noMalusi Yeni, oweBest Actress TV okubambene kuwo uNelisiwe Sibiya, uNombulelo Mhlongo noNqobile Magwaza.
Omumnye umunxa nawo okubonakala ukuthi kunokuncintisana okukhulu kuwona ngoweBest Newcomer Actor okukhona kuwona u-Andile Mtambo, uKaveshen Govindasamy noSipho Luthuli, bese kuba ngoweBest Newcomer Actress okuqhudelana kuwona u-Avela Cele, uDineo Nxumalo noMangaliso Mthembu.
UHope Mbhele noNay Maps Maphalala bazobe bengabaphathi bohlelo kulo mcimbi okulindeleke ukuthi ube sezingeni eliphezulu ngokuhleleka kwawo.