Uzizwe ethobekile enconywa ngumengameli ngomngcwabo kaNathi Mthethwa

 UMhlongo ubeqokwe ukuba ngumxhumanisi phakathi komndeni nohulumeni

Uthi bafisa kwakhiwe inkundla yezemidlalo nomtapo wolwazi okuzobizwa ngoNathi Mthethwa, ukuze igama lakhe lingashabalali...

John Hlongwa 

"AYIKHO into emnandi edlula ukuba uMengameli wezwe, uMnu Cyril Ramaphosa angibonge, angixhawule aphinde angisukumele angange, okuwuphawu lokungihlonipha ngomsebenzi engiwenze kungcwatshwa obeyinxusa laseNingizimu Afrika, eFrance, uMnu Nathi Mthethwa ngeSonto,".

Lawa ngamazwi ashiwo nguMnu Phiwe Mhlongo (43) oyikhansela le-ANC ngaphansi koMasipala uMhlathuze, ngemuva kokuba igama lakhe libe phezulu kulo mngcwabo.

UMhlongo ubeqokwe yiqembu lakhe ukuba abe ngumxhumanisi phakathi komndeni wakwaMthethwa nohulumeni ngesikhathi kwenziwa amalungiselelo alo mngcwabo obusesigabeni sesibili somngcwabo kahulumeni.

UMhlongo ube sematheni ngemuva kokubongwa ngumndeni kaMthethwa, yizikhulumi ezahlukene, nenhlangano yakhe okuholele ekutheni umengameli acele ukumbona lo muntu onconywa kangaka ngamalungu omndeni wakwaMthethwa.

Nasenkundleni yezemidlalo iSiyabonga Sangweni Sports Complex, eDondotha ebekubanjwe kuyona inkonzo yomngcwabo, bekuchwaza abantu uma kumenyezwa igama lakhe.

 YINKOSIKAZI kaMnu Nathi Mthethwa uNkk Philisiwe Mthethwa, uMaButhelezi emi eduze kukaMengameli wezwe uMnu Cyril Ramaphosa. 

URamaphosa naye ngesikhathi ethula inkulumo, ufike wambuza ukuthi uphi uMhlongo. Kuvele kwachwaza inkundla, kuzwakala ukuthi wonke umuntu ujabule indlela uMhlongo azikhandle ngayo ngesikhathi kuhlelwa lo mngcwabo.

Ngemuva kokuba umengameli eseqede inkulumo yakhe, esehleli nezicukuthwane etendeni, kubonakale uMhlongo eyoxhawula zonke izicukuthwane phakathi kwazo obekukhona uNobhala Jikelele we-ANC, uMnu Fikile Mbalula, iPhini likaMengameli uMnu Paul Mashatile noNdunankulu waKwaZulu-Natal, uMnu Thami Ntuli.

Ekhuluma neLANGA Lempelasonto uMhlongo, uthi kube wumzuzu omnandi abengawulindele ukuthi igama lakhe liqhakanjiswe ngumengameli wezwe.

"Ngesikhathi i-ANC izwa ngokudlula emhlabeni kwalowo owayeyinxusa, ngokuvumelana nonobhala jikelele,  ngibe yisigijimi esizohlanganisa umndeni wakwaMthethwa neqembu.

"Lokhu kusebenza kwami nomndeni, kwenze baqina kakhulu ubudlelwano bethu, yize bengiwazi umndeni phambilini.

"Emndenini sicele ukuba basiphe ithuba lokuba yingxenye yokwenza amalungiselelo omngcwabo, abadala bomndeni basivumela," esho.

Ubonga ithuba alithola ukusebenza noMthethwa esadla anhlamvana.

"Bengingalindele lutho ngoba uMthethwa wayesekhulile, efana nobaba kimina kodwa yena wakhetha ukuba umfowethu. 

"Siyaqhubeka nefa likaMthethwa njengoba sifisa kwakhiwe inkundla yezemidlalo esikoleni lapho afunda khona amabanga  aphansi, kuphinde kuthuthukiswe umtapo wolwazi ukuze umlando wakhe ungashabalali," kusho uMhlongo.