Kuzovela uhlangothi olungaziwa lukaMayoghurt kuMzansi Magic

Ngumculi kamaskandi uMayoghurt ogama lakhe langempela uMongezi Jama, okhuza ibuya nohlelo iShort and Sweet, olutshengiswa kuMzansi Magic.

Lucky Cain 

KUZOGQAMA uhlangothi lwezothando obelaziwa ngabasondelene naye kuphela uMayoghurt, ongumculi kamaskandi ohlelweni lukamabonakude olukhuza ibuya okwesithathu kuMzansi Magic, Channel 161 iShort & Sweet.

Lolu hlelo kulindeleke ukuba luqale ngoLwesine lomhla ka-6 kuNovemba kophezulu, ngo-8 kusihlwa. Lukhuza ibuya nabebevele bekhona okunguThandazani Kubheka (31), Vuyokazi Vovo Nguqu (40), Zandile Cele (29) naye uMayoghurt ogama lakhe langempela uMongezi Jama (24), nalabo abazobe beqala ukubonakala okungu Tebogo Shayi (31) noDimakatso Mathekga (31).

 Yingxenye yabakhuza ibuya ohlelweni iShort and Sweet, njengoba luzokwengeza nabanye.

Ekhuluma neLANGA Lempelasonto ngokubuya kwalolu hlelo uMayoghurt uthe, kulabo abebezitshela ukuthi bayamazi, bazomangala kulolu hlelo njengoba kuzovela olunye uhlangothi obelwaziwa ngabasondelene naye kuphela.

"Izinsizwa engikhule nazo, ziyazi ukuthi ngingumuntu obezifela ngesibhakela kanti kulolu hlelo ngizobonakala ngiqhudelana nezinye izinsizwa ezingontanga bami, ngizikhombisa ukuthi ngingubani," kusho uMayoghurt oteketiswa ngele- Bliss.

Uthe okunye okuzovela kulolu hlelo wudaba oluthinta umjolo wakhe nokuthi ngubani ngempela owesifazane osempilweni yakhe.

"Ngiyazi abantu bazi uMaMpanza (Bingelela), naye ukhona futhi ukhona nomunye ozobonakala kodwa ngeke ngande kakhulu, abantu bazozibonela impilo yami yangasese, hhayi le abayazi ezinkundleni zokuxhumana," kusho iBliss esizakhele igama nasemculweni kamaskandi.

Ngasohlangothini lomculo iBliss ithe isayithokozela indlela abalandeli bayo abayamukele ngayo
i-albhamu yayo eyikhiphe kulo nyaka esihloko sithi, Ibhinca Part 2. Ithe kumanje iyazibuza iyaziphendula ngokuthi iyikhiphe yini ingoma eyodwa yokuvala unyaka noma ilinde uMashi wonyaka ozayo.

UMayoghurt uthi lolu hlelo lukamabonakude lumqoka empilweni yakhe ngoba luvezela abantu ukuthi njengoba bebafushane, akusho ukuthi nengqondo imfushane kodwa baphila impilo eyejwayelekile njengabantu bonke futhi akukho okuhlukile ngaphandle kokuthi bafushane, nje kuphela.

"Kuningi abantu abakufundayo ngathi nokwenza kube lula bayiqonde impilo yethu ngaphandle kokuthi basidabukele nje," kusho yena.

Ubonge abahleli bemicimbi ngokwenza lo nyaka umhambele kahle, njengoba eveze ukuthi kusukela ekhiphile, uqashwa ezindaweni eziningi ukuyonandisa. Uthe nangoDesemba ikhona imicimbi aseqashwe kuyona, ukuzojabulisa abantu.