UGatsheni unikeze  iqembu lomndeni   ithuba lokuvelela

 Ufeze iphupho lezingane...

Uthi okumthinte kakhulu wukuthi lezi zingane zigidele izingoma zakhe ezintsha, zafaka i-video ezinkundleni zokuxhumana ...

Yiqembu lengoma yomndeni wakwaMbatha endaweni yaseMashona, oLundi, elizobonakala emcimbini kaGatsheni.

Mthobisi Sithole

UHLONZE ikhono emndenini oneqembu lengoma, walifaka ngaphansi kwakhe umculi kamaskandi uKhuzani "Gatsheni" Ndlovu.

UGatsheni ufeze iphupho lezingane zomndeni wakwaMbatha endaweni yaseMashona, oNdini, ebezijwayele ukuqopha ifolo lazo, zigidela izingoma zabaculi abahlukene.

UGatsheni uvakashele lo mndeni emuva kokubona lezi zingane zigidela izingoma ze-albhamu yakhe entsha ephumile esihloko esithi, "Amaphutha".

Uzibophezele ekutheni uzosebenza nezingane zaleli qembu lengoma, okokuqala ngqa emcimbini wakhe iGatsheni Music Festival, ozokuba mhla ka-3 ku-October, eNcotshane Sports Grounds, oPhongolo.

Uthi inhloso yakhe yokufaka lezi zingane ngaphansi kweqembu lakhe ngalolu suku, wukuthi azivulele amathuba angcono, ukuze nabanye abaculi bazinikeze ithuba, zithole amasenti.

UMCULI kamaskandi uKhuzani "Gatsheni" Ndlovu.

"Sekuyisikhathi eside lezi zingane zigidela izingoma zabaculi abahlukene, sikubona lokho ezinkundleni zokuxhumana kodwa zingakutholi okwesekwa emacikweni adumile, ekubeni zibambe iqhaza elikhulu ekuphakamiseni umculo wethu.

"Ngihlanganile nabazali bazo okungubaba uMbatha nomama uMaButhelezi, savumelana ngokuthi abantwana ngizobanikeza ithuba lokuthi bashiyelana inkundla nabaculi abakhulu emcimbini wami,"kusho uGatsheni.

Uthi okumthinte kakhulu wukuthi lezi zingane zigidele izingoma zakhe ezintsha, zafaka i-video ezinkundleni zokuxhumana .

Kulo mcimbi kuzobe kuboshelwe uMthandeni SK, uBig Zulu, uKhuzani, uMlabalaba, uMayoghurt, uMroza, Abafana bakaMgqumeni, uThokozani Langa, uNavigator, uJaiva zimnike, uMafikizolo, uGovozile, uLimit, uZanefa Ngidi, uJumbo, uNtencane, uDSD, uDumakahle, uFalabo, uMdumazi nabanye abaningi.

Amathikithi atholakala ezitolo ePick n' Pay, tickets Pro, Shoprite ngo-R100 kanti awezicukuthwane aqala ku-R500 kuya ku-R750.
mthobisis@ilanganews.co.za