IChiefs seyifuna iTop 8 kuNabi

UMotaung Jnr uthi kuyimpoqo ukuba badlale kwiMTN 8 ngesizini ezayo

Senzo Sokhela

ISIKHULU seKaizer Chiefs sidalula asebekufuna kumqeqeshi wale kilabhu uNasreddine Nabi osanda kuqeda ishobolo leminyaka eyishumi le kilabhu inganqobi lutho, ewina isicoco seNedbank Cup.

Lokhu uNabi ukwenze ngesitayela eguqisa omkhaya i-Orlando Pirates ngo-2-1 ngeledlule eMoses Mabhida Stadium, eThekwini.

IChiefs isizobhekana neSekhukhune United koweBetway Premiership ngoMgqibelo ngo-15h00 ePeter Mokaba Stadium, ePolokwane.

NGUMQEQESHI weKaizer Chiefs uNasreddine Nabi noKaizer Motaung Jnr oyiSporting Director kule kilabhu.

UKaizer Motaung Jnr oyiSporting Director kwiChiefs, uthi sebedinga ukuqeda kwiTop 8 kuNabi okunamahlebezi athi angase akhululwe ngokuphela kwesizini.

"Sidinga ukuba kwiTop 8. Lowo bekuwumgomo esizibekele wona ngaphambi kokuqala kwesizini. Isiphuthile ngonyaka owedlule. Sizolwa ngakho konke ukwenza isiqiniseko sokuthi siba yingxenye yayo yonke imiqhudelwano yangesizini ezayo.

"Sisalelwe yimidlalo emibili enzima okuyiPolokwane City neSekhukhune okungamakilabhu enza kahle ngale sizini. Ngeke kube lula kodwa ngasohlangothini lwethu kuyimpoqo ukuthi singene kwi-top 8, ngakho-ke kufanele senze isiqiniseko sokuthi siyakwenza lokho," esho.

Uphikile ukuthi uNabi uzokhululwa kodwa wathi basazokuba nomhlangano nalo mqeqeshi wokubuyekeza konke okwenzeke kule sizini.

Isiyonke imidlalo yeBetway Premiership engempelasonto iqhathwe kanje:-
NGOMGQIBELO
EDr Molemela Stadium: Marumo Gallants vs Chippa United 15h00.
E-Orlando Stadium: Orlando Pirates vs TS Galaxy 15h00.
E-Old Peter Mokaba: Polokwane City vs Cape Town City 15h00.
EKing Zwelithini: Richards Bay vs Golden Arrows 15h00.
EPeter Mokaba: Sekhukhune United vs Kaizer Chiefs 15h00.
EDanie Craven: Stellenbosch vs SuperSport United 15h00.
NGESONTO
ELoftus Versfeld: Mamelodi Sundowns vs Magesi 17h30.