ITheku lihlomule ngezigidi kwiHDJ

Lucky Cain

IMEYA yeTheku, uMnu Cyril Xaba, ichaze i-Hollywoodets Durban July (HDJ) njengomcimbi owumgogodla ukuthuthukisa umnotho waleli dolobha, emuva kokuphuma kwemiphumela yalo mcimbi walo nyaka, obungomhla ka-5 kuJuly.

AbakwaHollywoodbets bakhiphe umbiko ogcwele ngendlela umcimbi walo nyaka owenze ngayo kwezokuthuthukisa umnotho, nangamathuba emisebenzi akhiqizekile ngempelasonto yalo mcimbi.

 Ngokwesitatimende esikhishwe ngabakwaHollywoodbets, umcimbi walo nyaka wakhe amathuba emisebenzi alinganiselwa ku-4 500 emikhakheni eyahlukene; kusukela kwezokuvakasha, ezokuthutha, ezokuphepha, abemicimbi, ezobuciko namasiko.

Siqhuba ngokuthi owanonyaka ufukule umnotho weTheku ngesamba esilinganiselwa ku-R840 million, okuyisibalo esingaphezulu kwebesilindelekile ngalo mcimbi.

NGUMNU Xaba.

Ngokwezibalo eziqondile, ezisemthethweni, umcimbi walo nyaka uhanjelwe ngabantu abawu-40 192, abebeqhamuka ezinkalweni ezahlukene zeNingizimu Afrika, nangaphandle.

Isikhulu sezokuxhumana kwaHollywoodbets, uMnu Devin Heffer (Brand And Communication Manager), sithe unyaka nonyaka, lo mcimbi uyaqhubeka nokuzibonakalisa njengensika yokufukula umnotho nokwakha amathuba emisebenzi.

 "Kuyasithokozisa ukuthi lo mcimbi wenza umehluko empilweni yabantu, futhi ufukule nosomabhizinisi abasafufusa, bakwazi ukuhlomula ngawo," kusho uHeffer.

Uthe iHDJ kayisewona nje umcimbi, kodwa isiyingxenye yezomnotho KwaZulu-Natal.

Uqhube ngokuthi okuhle ngayo, ubuye ube yinkundla yokuzibonakalisa emacikweni ahlukene, nakubasiki bengqephu  abasafunda - ngaphansi kohlelo lweYoung Designer Awards.

Uthe amalungiselelo omcimbi wangonyaka ozayo aseqalile.
Uthe bazimisele ngokuqhubeka nokuzibophezela ukwenza into yamehlo ngenhloso yokukhuthaza ubumbano, ezokuvakasha nokuqhakambisa amasiko ukuze nezizukulwane ezizayo zihlomule ngalo mcimbi.

UXaba uchaze lo mcimbi njengensika nomgogodla waseThekwini ngokuthuthukisa umnotho.

"Uyisibonelo esihle esiqhakambisa ukubambisana phakathi kwezinkampani ezizimele nohulumeni, nokuthi umphakathi ungazuza kanjani ngalolu hlobo lobudlelwano.

"Lo mcimbi uveza ngokusobala okungenzeka uma singaqhubeka nokuqhakambisa iTheku ngezindlela ezahlukene ezikwazi ukulibeka ebalazweni lomhlaba," esho.