LABA ngabahleli be-festival yamafilimu eMlazi, nezicukuthwane ebeziyihambele. Isithombe ngu: Lucky Cain

Isiheha nabaphesheya i-festival yamafilimu eMlazi

Adonswe ngendlebe amaciko afufusayo ukulibambisisa leli thuba

Lucky Cain noLinda Ximba

IYADLONDLOBALA iMlazi International Film Festival, njengoba isihehe ngisho nesihlabani somculi nomlingisi wase-USA, uSyleena Johnson (osesithombeni esingezansi), esizokuba yingxenye yayo ngonyaka ozayo.

Lokhu kuvezwe nguDkt Syleecia Thompson, oyi-Associate Professor of Enterpreneurship & Business, eNational University, eMelika, ngesikhathi kwethu-lwa izinhlelo ze-festival yalo nyaka eMangosuthu University of Technology (MUT) ngoLwesibili.

UDkt Thompson ungudadewabo kaSyleena, aphinde abe ngumphathi wezindaba zalo mzwilili odume ngezingoma ezithi, "I am Your Woman" nethi, "Baby I'm so confused".

Ekhuluma ngobuchwepheshe besimanje ekwelaku-bo uDkt Thompson ngoLwesibili, uthe: "Nakanjani ngizofika noSyleena eNingizimu Afrika njengoba esezinhlelweni zokwenza umculo wama-piano namaciko adumile lapho anjengeMafikizolo noDJ Cleo."

Kulo nyaka le festival izobe yenzeka ihlandla lesine. Izoqala ngomhla ka-24 kwephezulu kwaMax's Lifestyle Village, eMlazi. Izovulwa ngokubukwa kwefilimu esihloko sithi, Amathambo, edidiyelwe nguSbu Ndlovu.

UMichael Ngema oyiChief Executive Officer (CEO) yale festival, ubonge abaxhasi ngokufaka isandla, wathembisa ukuthi ngeke bayikhalele imali nesikhathi sabo ngoba badidiyele amafilimu ahlabahlosile kulo nyaka.

Izilomo zabalingisi uThabo Mnguni noMduduzi Ntombela, badonse ngendlebe amaciko afufusayo ukulibambisisa leli thuba abalinikwa yile festival.

Abanye bazothola nethuba lokwazi ngamathuba akhona kulo mkhakha, ikakhulukazi kule misebenzi engemuva, efana nokuqondisa imidlalo nokusebenzisa ikhamera yokuqopha.

USabelo Ngema oyiChief Operating Officer (COO) yale festival, uthe bazophinde bavule nethuba lokuthi abakhiqizi bamafilimu abasafufusa bethule amafilimu abo angakaqoshwa, ngenhloso yokuthola uxhaso olungafinyelela ku-R1 million lokuqopha leyo filimu.

Le festival izophothulwa ngomcimbi wokuklomelisa abakhiqizi, ababhali, abaqondisi nabalingisi bemidlalo ngezigaba zabo ezahlukene.