YILADYSMITH Black Mambazo eza eThekwini.

Ibuya ngekhonsathi iMambazo eThekwini

Izokuba namakhonsathi ezinsuku ezimbili eThe Playhouse, ngelizayo

Lucky Cain

IKHUZA ibuya eThekwini iLadysmith Black Mambazo, ethathwa njengeqembu elihamba phambili eNingizimu Afrika ngokunqoba izindondo zeGrammy.

IMambazo ihlele umcimbi ohambisana nomzungezo ozokuba ngoMgqibelo nangeSonto elizayo lomhla ka-22 no-23 kuNovemba, eThe Playhouse, eThekwini.

Leli qembu kulindeleke ukuba liqhulule amanoni alo amadala elazakhela ngawo udumo, kanjalo namasha kulo mcimbi okubhekwe ukuthi uhehe abathandi bomculo wesicathamiya.

Lizobe lihambisana nelinye iqembu elivundululeke esikhungweni salo esingumahamba nendlwana, iLadysmith Black Mambazo Mobile Academy, elibizwa ngeLadysmith Lemon.

UXolani Majozi ophethe izindaba zaleli qembu, uthe konke sekumi ngomumo ngomcimbi waseThekwini njengoba leli qembu lizimisele ukwenza into yomhlaba kuwona.

"ITheku lifana nekhaya kwiLadysmith Black Mambazo. I-albhamu yalo yokuqala yaqoshelwa eThekwini, ezindlini zokusakaza zoKhozi (kusewuRadio Bantu).

"Ngakho njalo uma liza eThekwini, lizizwa lisekhaya, futhi kuyaziwa ukuthi linomlando eClermont, okuyindawo engaphansi kwalo iTheku," esho.

UMajozi wethembisa abazohambela lo mzungezo ulozolo lomcimbi. Leli qembu like laba sematheni nge-albhamu eliyikhiphile ehlanganisa izintandokazi zabaculi, okubalwa kubona uNduduzo Makhathini noMbuso Khoza (abasesithombeni esingenhla).

Kuyimanje linengoma edlalwayo emisakazweni eyahlukene, esihloko sithi, You Make Me Happy.
Le ngoma ingenye yezithandwa kakhulu zaleli qembu kulezi zinsuku.

UMajozi unxuse abantu ukuba baphume ngobuningi kulezi zinsuku ezimbili njengoba ngemuva kwazo, lizodlulela ePretoria, eState Theatre, ngomhla ka-29 no-3O kuNovemba.

Uthe yilapho kuzobe sekuvalwa unyaka ngegiya eliphezulu.
Amathikithi okuhambela lo mcimbi ayatholakala ePick' n Pay naseWebtickets.