Isilomo seChiefs nenkulumo ekitaza abalandeli

NGULANGELIHLE Phili ongumdlali omusha weChiefs.

ISITHOMBE NGABE: BACKPAGEPIX

Senzo Sokhela

IKITAZA abalandeli beKaizer Chiefs inkulumo kaLangelihle Phili (20), odlala esiswini kule kilabhu, ethi bazobhema bakholwe kule sizini njengoba bengeke basinise amahleza kwiBetway Premiership kule sizini.

Uyenze ngaphambi komdlalo omkhulukazi weChiefs neMamelodi Sundowns weBetway Premiership, ozokuba ngoMgqibelo ngo-15h00 eFNB Stadium, eSoweto.

UPhili udlala ibhola eliseqophelweni eliphezulu, okwenza kulindeleke lukhulu kuyena. Uqokwe njengomdlali wosuku iziMpofana ziguqisa iSekhukhune United ngo-2-0 koweBetway Premiership ngoLwesithathu ebusuku eFNB Stadium.

Amagoli eChiefs avalelwe enethini nguLuke Baartman noMduduzi Shabalala.
Ibuyele esicongweni emuva kokunqoba lo mdlalo.

NGUPHILI "egudluza" endleleni isitobha seSekhukhune United, uTshepo Mashiloane.

ISITHOMBE NGABE: BACKPAGEPIX

UPhili uqale umdlalo wakhe wokuqala kule kilabhu njengoba isanda kumthenga kwiStellenbosch FC.

Akazange aphoxe njengoba edlale ingcwenga yebhola. Lo mdlali odabuka eTshelimnyama, eMariannhill, uthi abantu basazobhema bakholwe yinto asazoyenzela amaKhosi.

"Okokuqala nje, ngithanda ukubonga uNkulunkulu ngokungibusisa ngaleli khono enginalo, ngaphandle kwakhe ngabe kangiyilutho.

"Ngidlulisa ukubonga nasemndenini wakwaMotaung ngokunginika ithuba lokudlalela ikilabhu enkulu kangaka. Engifuna ukukubeka kucace wukuthi njengoba ngilapha ngizosebenza kanzima, ukuze le kilabhu inqobe izinkomishi.

"Uma ngilinikiwe ithuba ngizokwenza konke okusemandleni ukuthi siyanqoba. Kukhulu engizimisele ngokukwenzela le kilabhu ngokulekelelana nozakwethu.

"Abantu bazobhema bakholwe, kasizile ukuzodlala ngale sizini, sizoncintisana," kusho uPhili.

Abalandeli beChiefs bahambela phezulu kulezi zinsuku njengoba ezabo ziyiqale ngegiya elihle isizini zinqoba imidlalo yazo emibili yokuvula.

Isiyonke imidlalo yeBetway Premiership engempelasonto imi kanjena:-
NGOLWESIHLANU
E-Athlone: Stellenbosch FC vs Marumo Gallants 19h30.
NGOMGQIBELO
EKings Park: AmaZulu FC vs Siwelele 15h00.
E-FNB: Kaizer Chiefs vs Mamelodi Sundowns 15h00.
ESeshego: Sekhukhune United vs Polokwane City 17h30.
EChatsworth: Durban City vs Richards Bay FC 20h00.
ESugar Ray: Milford FC vs Kruger United 20h00.
NGESONTO
EKings Park: Chippa United vs Orlando Pirates 15h00.
ESolomon Mahlangu: TS Galaxy vs Golden Arrows 17h30.