Bangqongqoza eminyangweni eyahlukene ukusiza owaKwaNongoma kwiBig Brother

NguLindokuhle 'Bravo BNsele', Odabuka eSicayini, KwaNongoma othole elinye ithuba kwiBig Brother.

Nhlanhla Hudla 

BANGQONGQOZA eminyangweni eyahlukene ngenhloso yokusiza uBravo B, ukudlulela esigabeni sowamanqamu ohlelweni lukamabonakude iBig Brother Mzansi Bazozwa, olukhonjiswa esiteshini iMzansi Magic, Channel 161 ngamaSonto nakwiChannel 198 nsukuzonke, ubusuku nemini.

Lokhu kushiwo wumndeni wale nsizwa ogama layo langempela nguLindokuhle Nsele, edabuka eSicayini, KwaNongoma.

UBravo B ungomunye wabamele iKwaZulu-Natal kulolu hlelo. Abanye nguThandeka Tshabalala
no-Ashay Sewlall, asebeyingxenye ye-top 8. Sekusele isonto elilodwa lolu hlelo lufinyelele kowamanqamu.

IBig Brother isifike kuvuthondaba, njengoba sekuhlukana inhloko nesixhanti. Sekungokwesibili uBravo B ethola ithuba lokungena kulolu hlelo. Ngesikhathi engena okokuqala eminyakeni emibili eyedlule, wagcina ngokuxoshwa ngenxa yokuphimisa amagama azwakalisa ukunukubeza ngokocansi.

Kule sizini unikezwe ithuba lesibili nabanye abakhishwa ngezindlela ezahlukene kula masizini edlule okunguMmeli Khumalo noLiema Pantsi abayingxenye ye-top 8, noMpendulo Dube osekhishiwe kulolu hlelo.

Ekhuluma neLANGA Lempelasonto uVusi Siyaya ongomunye wabangani bakaBravo B, uthe bajabule ngokunikezwa kukaBravo B ithuba lesibili kulolu hlelo.

“Esikujabulela kakhulu wukuthi akwazi ukufika lapha ekhona njengamanje. Siyaziqhenya kakhulu ngalokho. Esikunxusayo nje, wukuba abantu
ba-mvotele, ukuze ezokwazi ukudlulela phambili.

“Siyazi ukuthi izinto seziyanyukela manje. Nathi sizamile ukuya eminyangweni eyahlukene, ngenhloso yokuthola ukwesekwa. Ngeke sakhuluma kakhulu ngokuzokwenzeka uma enqoba, ngoba asifuni ukumfakela ingcindezi,” kusho uSiyaya.

Uthe kulokhu benze isiqiniseko sokuthi bayamyala ukuba aziphathe kahle, ukugwema amaphutha awenza phambilini.

“Okuhle nje ngaye wukuthi ungumuntu ozithobile, futhi ohloniphayo,” kusho lo mngani wakhe osondelene nomndeni wakhe.

Uveze ukuthi kubalulekile ukuthi uma ukulolu hlelo,  ube nabaxhasi.
KwiBig Brother bavamise ukwenza kahle abadabuka kulesi sifundazwe, njengoba kula masizini amathathu, lwanqotshwa ngabadabuka KwaZulu-Natal.

Abanqoba nguKhosi Thwala waseNewcastle owanqoba eminyakeni emithathu eyedlule ohlelweni olufanayo iBig Brother Africa, olwabe luhlanganisa abantu abaqhamuka emazweni ahlukene ezwenikazi i-Afrika, uMcJunior owanqoba kwiBig Brother Mzansi Siyamosha noSweet Guluva, owanqoba ngonyaka owedlule, kolwabe lubizwa ngeBig Brother Mzansi Umlilo.