NGUNDABAYITHETHWA Ndlondlo ezama ukudlubulundela kuMasindi Nemtajela wePirates. 

ISITHOMBE NGABE: BACKPAGEPIX

Senzo Sokhela

USAYIBAMBELE igqubu i-Orlando Pirates uNdabayithethwa Ndlondlo ongumdlali weMarumo Gallants, okwenza afune ukuziphindiselela uma la makilabhu esebhekene koweBetway Premiership ngoMgqibelo ngo-15h30 e-Orlando Amstel Arena, eSoweto.

Nakuba iBucs ihlulwe yiGallants ngo-2-1 emzuliswaneni wokuqala obuseBloemfontein, kodwa uNdlondlo uthi usayibambele igqubu ngekwenze kubona kowamanqamu weCarling Knockout, okubaphuthisele ngendebe obekuzokuba ngeyabo yokuqala esigabeni esiphakeme.

IBucs inqobe iGallants ngo-1-0 wegoli likaRelebohile Mofokeng kowamanqamu obusePolokwane, mhla ka-6 kuDecember nyakenye.

NGUNDLONDLO eqashwe ngeso lokhozi nguRelebohile Mofokeng weBucs.

ISITHOMBE NGABE: BACKPAGEPIX

UNdlondlo - olihlikihla esiswini kwiGallants futhi odlale iminyaka kwiBucs - uthi nakanjani bafuna iPirates izwe ubuhlungu ebazwise bona ePolokwane.

"Silindele umdlalo onzima kwiPirates, ikakhulukazi njengoba idlalela ekhaya. Ngendlela abalandeli bayo abayeseka ngayo uma isekhaya, kuhlale kunzima ukubhekana nayo.

"Kodwa-ke lokho kakusho ukuthi ngeke ishayeke, noma kanjani sizoyishaya, kukhona esiyifihlele khona.

"Sifuna nokuziphindiselela njengoba isishaye kowamanqamu weCarling Knockout. Inhloso yethu wukubuyisa izinduku ngokuyiqhuzula njengoba ifuna ukunqoba isicoco seligi. Sizokwenza lokho njengoba sikwazile ukukwenza emzuliswaneni wokuqala," esho.

IGallants yasungulwa ngo-2021 kuthengwa ilungelo leTshakhuma Tsha Madzivhandila (TTM) lokudlala kwiPremiership, yadliwa kowamanqamu weNedbank Cup yiPirates ngo-2022, okwenza yadlala iCaf Confederation Cup ngesizini ka-2022/23 lapho eyafinyelela khona kuma-semi final. 
Ishoveleke ehlathini ngesizini ka-2022-23. Ibuyele kwiPremiership ngokuthenga ilungelo leMoroka Swallows.

Isiyonke imidlalo yeBetway Premiership ezokuba ngale mpelasonto iqhathwe kanje:
NGOLWESIHLANU
EChatsworth Stadium: Durban City vs TS Galaxy 19h30.
ESeshego Stadium: Magesi vs Golden Arrows 19h30.
NGOMGQIBELO
E-Orlando Amstel Arena: Orlando Pirates vs Marumo Gallants 15h30.
E-Old Peter Mokaba: Polokwane City vs Siwelele 18h00.
EBuffalo City: Chippa United vs Richards Bay 20h15.
NGESONTO
EPeter Mokaba: Sekhukhune United vs Orbit College 15h30.