Lithole ikhaya elisha olosaziwayo abaculayo

Lolu hlelo luveze ikhono lomculo  kwabebeqave kweminye imikhakha...

LUTHOLE ikhaya elisha uhlelo lukamabonakude oluqhakambisa ithalente lomculo kosaziwayo bakuleli, iThe Masked Singer, esizokhonjiswa kwiSABC 2 kusukela ngomhla ka-4 kuJulayi kophezulu.

Lolu hlelo olugabe ngamajaji okubalwa kuwo uSomizi Mhlongo, uSkhumba Hlophe, uJ Something noSithelo Shozi, lumema osaziwayo abahlukene ukuba bayocula bezifihlile bese la majaji ayaqagela ukuthi yimuphi usaziwayo osuke ecula.

Nababukeli bayalithola ithuba lokuqagela, baphinde bavotele osuke ecule kahle kuleso siqephu. Usaziwayo ocule kahle udlulela esigabeni esilandelayo kuze kufinyelele kowamanqamu, aklonyeliswe ngendondo nangesamba semali.

 NguSithelo Shozi ongomunye wamajaji kwiThe Masked Singer.

Ngesizini edlule uWarren Masemola, nguyena owadla umhlanganiso kulolu hlelo. Kanti nomzwilili wakuleli uHolly Rey, nguyena owaba ngusaziwayo wokuqala ukunqoba kulolu hlelo.

Kusukela ngomhla ka-4 lolu hlelo seluzokhonjiswa kwi-SABC 2, njengoba phambilini luke lwakhonjiswa kwi-SABC 3 nakuMzansi Magic. Sichaza ngokuthola ikhaya kwiSABC 2 isikhulu salesi siteshi sikamabonakude uRobyn Verweiji, sithe lolu hlelo luyahambisana nalesi siteshi, luzokwenza ababukeli bathi njo, kusona.

Sithe ngaphandle kokukhonjiswa kulesi siteshi,  impinda yalo izokhonjiswa nakwiSABC 1, njalo ngoLwesine kusihlwa.

Ethintwa uSithelo ongelinye lamajaji aqavile kulolu hlelo, uthe okwamanje abakavunyelwa ukukhuluma nabezindaba ngalolu hlelo, kodwa ngokuhamba kwesikhathi uzokwazi ukuchaza ngokuba yingxenye yalo kusukela lwasungulwa.