Mthobisi Sithole

UHLENGE izikole uNdunankulu waKwaZulu-Natal, uMnu Thami Ntuli ngamaqhinga  okutholakala kwemali yezinsiza-kusebenza ukuze kuqhubeke ukubhalwa kwezivivinyo zokuhlolwa kwabafundi, njengoba othisha bebebhikisha amasonto amabili adlule, kwaze kwaphazamiseka ukubhala.

Ngokomhlangano obungoLwesine ntambama phakathi kwezinyunyana zothisha - iNatu neSadtu - yizikhulu zomnyango wezemfundo, undunankulu noNgqongqoshe wezeMali KwaZulu-Natal uMnu Francois Rodgers, kuphunywe nesinqumo sokuba kuncozulwe imali kweminye iminyango kahulumeni wesifundazwe, inikezwe owezemfundo ukuze kuqhubeke ukufunda nokufundisa.
Isiyonke imali ezothathwa kweminye iminyango, iwu-R900 million. 

UMNU Ntuli (okwesokudla) nongqongqoshe wakhe wezemfundo, uMnu Sipho Hlomuka (oseceleni kwakhe) behlangene namalungu ezinyunyana.

ISITHOMBE: SITHUNYELWE

UMengameli weNatu, uMnu Sbusiso Malinga, uthe bayasemukela isinqumo sikandunankulu sokuqinisekisa ukuthi imali yezikole, iyakhokhwa.

"Okusimangaze kakhulu wukuthi (undunankulu) ubengazi ukuthi kunezinkinga ezinkulu kangaka ezikoleni. Sizimisele ngokubuyela emsebenzini, sibhalise abantwana uma imali isingenile, ngoba nakuba kuxoxiwe kodwa inhlupheko ngeke ishintshe uma ingakakhokhwa imali," esho.

Uthe ukubhala kwezingane kuphazanyiswe wukuthi kazikho izinsiza zokuzibhalisa, akubona othisha abayinkinga.

UNobhala weSadtu KwaZulu-Natal, uNkz Nomarashiya Caluza, uthe bathokozile ngomhlangano oqhamuke nesixazululo ezinkingeni ababhekene nazo.

Utshele ILANGA Lempelasonto ukuthi kuningi abakhala ngakho, okungenzeki ngendlela emnyangweni wezemfundo.

"Umhlangano ubemuhle kakhulu. Inhloso yethu bekuwukuchazela undunankulu ngendlela azoyizwa kahle ngayo le nkulumo, ngoba kungenzeka ukuthi abanye kabachazi kahle.

"SiyiSadtu, kasikaze sithi mazingabhalwa izivivinyo, kodwa izimo zokungabi bikho kwezinsiza zokubhalisa, yizona eziholele kulokho. Sizokuba nomhlangano wesigungu esiphezulu senyunyana nenhloko yomnyango wezemfundo, ukuze kubhekwe umhlahlandlela, njengoba kungabhalwa ezikoleni," kusho uNkz Caluza.

Imali yezinsiza-kusebenza - ezokhokhwa - ekweletwa izikole isukela nyakenye.
Kulo mhlangano kuvunyelenwe ngokuthi le mali izokhokhwa emasontweni amabili.
mthobisis@ilanganews.co.za