Ubonga ukwethenjwa ngabalandeli umlolongi weGolden Arrows

NGUMANQOBA Mngqithi ongumqeqeshi we-Arrows.

ISITHOMBE NGABE: BACKPAGEPIX

Senzo Sokhela

UBONGA ukunikwa itoho njengoba imidlalo yeligi yaseNingizimu Afrika isavalile umqeqeshi weLamontville Golden Arrows, uManqoba "TV" Mngqithi.

I-Orlando Pirates eyizingqwele zeCarling Knockout izobhekana nekhethelo labadlali bePremier Soccer League (PSL) elibizwa ngeCarling All-Stars koweCarling Cup ngoMgqibelo ngo-15h00 eMoses Mabhida Stadium, eThekwini.

Abalandeli yibona abavotela isikimu esizoqala, nomqeqeshi ozocija lesi sikwati.

UMngqithi nguyena ovotelwe ngabalandeli ukuhola leli qembu le-All-Stars.

NGUMFUNDO Vilakazi weKaizer Chiefs ongesinye sezethenjwa zeCarling All-Stars.

ISITHOMBE NGABE: BACKPAGEPIX

UMngqithi ekhuluma nabezindaba emcimbini i-#No-Excuse obuseMoses Mabhida Stadium ngoLwesithathu emini, ubonge ukunikwa leli toho njengoba imidlalo yeligi ivalele i-Africa Cup of Nations (Afcon) ezoqala mhla ka-21 kule nyanga, ize iphele mhla ka-18 kuJanuary, eMorocco.

"Ngibonga ngiyanconcoza ngokuqokwa, lokhu kuyizinkomba zokuthi kukhona umuntu okuhle akwenzayo.

"Kodwa-ke kangilujwayele lolu hlelo lokuboshelelwa isikimu, mhlawumbe umuntu kuzofanele azame ukuqala ukulwejwayela ngoba mhlawumbe kukhona okuzayo.

"Ngiyajabula kakhulu futhi ngiyabonga ngaleli toho lesikhashana engilitholile, ngiyethemba ukuthi sizoba nomdlalo omuhle," kusho uMngqithi sakuncokola.

Iqembu leCarling All-Stars limi kanje:
uBrandon Petersen (Kaizer Chiefs);
UKeabetswe Khonyane (Siwelele FC);
USikhosonke Langa (Sekhukhune United);
UVincent Sithole (Mamelodi Sundowns);
UThabo Nkabinde (Sundowns);
UMarcelo Allende (Sundowns);
UThulani Mabaso (Chiefs);
UMfundo Vilakazi (Chiefs);
UNdabayithethwa Ndlondlo (Marumo Gallants);
UNaledi Hlongwane (Chiefs);
no-Arthur Sales (Sundowns).