Luzokwandulelwa 
yiziqephu eziyisipesheli olweBig Brother Mzansi

NguKhosi Twala oseke wakhala wemuka nomklomelo kwiBig Brother Mzansi.

Lucky Cain

Luzokwandulelwa yiziqephu ezine eziyisipesheli zokubuyisana, uhlelo lukamabonakude oluhlanganisa abantu abahlukene endlini eyodwa, iBig Brother Mzansi, olukhuza ibuya okwesithupha ngonyaka ozayo.

Isiqephu sokuqala kulezi ezine, kulindeleke ukuba siqale ngeSonto mhla ka-14 Disemba kophezulu, esiteshini sikamabonakude uMzansi Magic.

Ngokusho kwesitatimende esikhishwe yiMultiChoice, okuyinkampani eyengamele uMzansi Magic, siveze ukuthi lezi ziqephu ezine ezizodlala njalo ngeSonto, zizobe zihlanganisa abake baba ingxenye yamasizini adlule alolu hlelo, okubalwa kuwo iBig Brother Siyamosha, neBig Brother Umlilo.

Kulindeleke ukuba kulezi ziqephu kuhlanganiswe ababe yinkukhu nempaka besengaphakathi kule ndlu, ngenhloso yokuthola ukuthi kukhona yini osekushintshile njengoba sebaphumela emphakathini. Kuzobhekwa  nalabo abakhe ubudlelwano bomjolo nokunye, ngenhloso yokuthola ukuthi uthando lwabo lusavutha amalangabi yini.

Kulezi ziqephu kuzovela ababe yingxenye yalama sizini adlule, bezikhulumela bona ngalokhu abakwenzayo ngemuva kokuphuma ohlelweni, nokuthi yikuphi osekushintshile. Uhlelo lweBig Brother lubalwa nolunye oselukhiqize inqwaba yosaziwayo emikhakheni eyahlukene.

Kwabanye iminyango iyavuleka uma sebephumele emphakathini, kanti abanye bayanyamalala, bangaphinde babonakale kulo mkhakha.

Okunye okuzodingidwa kulezi ziqephu yikhona ukuthi kwabasebenzela kanjani empilweni ukuba kwiBig Brother.

Kulindeleke ukuthi isizini entsha  iqale ngomhla ka-11 kuJanuwari 2026, ngaphansi kwesiqubulo esisha esithi, "Bazozwa". Lolu hlelo luzoqhubeka nokukhonjiswa kuMzansi Magic njalo ngeSonto, bese lukhonjiswa nasesiteshini esiyisipesheli esikhonjiswa ubusuku nemini iChannel 198 kwi-DStv.

Kusuka kwesobunxele nguMcJunior, nguSweet Guluva, noMpho Wa Badimo asebeke banqoba kwiBig Brother Mzansi.

Phakathi kosaziwayo abahlukene abakhiqizwe yilolu hlelo, kubalwa uMcJunior, Sweet Guluva, Khosi Twala owanqoba kwiBig Brother Africa, Ashley Ogle, Themba Broly, Mpho Wa Badimo nabanye abaningi.

Khona manjalo kulindeleke izinhlelo ezimbili ezintsha esiteshini sikamabonakude esiwuzakwabo weMzansi Magic uMzansi Wethu: olubizwa ngeSpinza Aside, olukhuluma ngamakhaphuli acwila ezinkambezi zikaFaro, nolunye olubizwa ngeThe Real City Makoti, olukhuluma ngabesifazane abane abaphila impilo yasemadolobheni, bebe bemise imishado yabo.