IBHEKENE nengwadla yokumiswa kwabadlali ngaphambi komdlalo wayo omqoka wamanqamu weFifa Club World Cup, iParis Saint Germain (iPSG) yaseFrance ezobhekana neChelsea yase-England ngeSonto ngo-21h00 e-United State of America (USA).

Lo mqhudelwano sewufike emaphethelweni emuva kokuba udlalwe ngamakilabhu awu-32 okokuqala ngqa nonyaka.

Abadlali ababili bePSG, uWillian Pacho noLucas Hernandez bazokube bengekho ngenxa yamakhadi abomvu abawathole ngesikhathi le kilabhu iwashisa ijezi iBayern Munich yaseGermany - ngegoli likaDesire Doue nelika-Ousmane Dembele - kuma-quarter final.

NGU-PACHO esho ukunqamula uThomas Muller weBayern, okwenze wathola ikhadi elibomvu.

Nakuba laba badlali bezokube bengekho, kodwa kubukeka kungeke kube yinkinga engako njengoba bebevele bedonsa isigwebo nangesikhathi iPSG ixebula iReal Madrid yaseSpain ngo-4-0 kwi-semi final.

I-PSG izokuya kulo mdlalo iyizimfivilithi ukuwunqoba kwazise ilokhu iqhubekile nokuzenzela emakilabhini athathwa njengamakhulu.

Ishaye i-Inter Milan yase-Italy ngo-5-0 kowamanqamu we-Uefa Champions League.

YINGXENYE yabadlali bePSG okulindeleke bathwalise kanzima iChelsea kowamanqamu weFifa Club World Cup. Kusuka kwesobunxele kuNuno Mendes, nguVitinha, uMarquinhos, uDesire Doue no-Ashraf Hakimi.

Endleleni yayo ebheke kowamanqamu we-Club World Cup, iPSG ithele othulini i-Inter Miami yase-USA ngo-4-0, kwi-last 16, yalandelisa ngeBayern (2-0) neMadrid (4-0).
Bekuwu-4-0 wesithathu iwushaya kulo mqhudelwano njengoba ivule eyamaqoqo ngokubhabhadisa ngawo omkhaya beMadrid, i-Atletico Madrid.

IChelsea kayiwona amavukana kweyamanqamu ehlanganise amakilabhu amazwe. Ngo-2021 yavova inkani omkhaya bayo, iManchester City, ibahlula ngo-1-0 wegoli likaKai Havertz kowamanqamu we-Uefa Champions League, phezu kokuba yayikade inganikwe thuba.

Yakwenza nango-2012 ihlula iBayern sekukhahlelwa amaphenathi emuva kokuba umdlalo wawuphele ngo-1-1. 

Ngawo u-2012, yahlulwa yiCorinthians yaseBrazil ngo-1-0 kowamanqamu weClub World Cup.
Yawunqoba lo mqhudelwano ngo-2021 ihlula iPalmeiras yaseBrazil ngo-2-1.