UZodwa uxwayiswe ngokudunusa eHlalankosi

 NguZodwa Wabantu ozobonakala eRoka Fella Club, KwaNongoma ngomhla ka-26 kwephezulu.

 Lucky Cain

UXWAYISWE ngokudunusa eHlalankosi, uZodwa Wabantu ozojabulisa abantu emcimbini ozoba seRoka Fella Club, KwaNongoma ngomhla ka-26 kwephezulu.

UZodwa Wabantu owaziwa ngokudunusa nokuveza isitho sangasese, uzojabulisa abantu ehambisana nenkakha kamaskandi uThokozani Somnandi Langa, emcimbini obizwa ngeZodwa Wabantu VS Thokozani Langa.

Ngokusho komhleli walo mcimbi uMenzi Sibiya, lo mcimbi uzoba nabanye osaziwayo okubalwa kubo uBingelela Mpanza woKhozi FM, noHelicopter wesiteshi sikamabonakude i-1 KZN.

 NguThokozani Somnandi Langa ozonandisa eRoka Fella Club, KwaNongoma ngomhla ka-26 kwephezulu.

Uveze ukuthi uSpikili ungomunye wabaculi abazobe bejabulisa abantu kuwona lo mcimbi.

Echaza ngokuhlanganisa uZodwa noThokozani emcimbini owodwa uSibiya, uthe lokhu ukwenze ngamabomu.

"Okumele abantu bakuqonde wukuthi uZodwa noThokozani bangamaciko ajabulisa abantu ngezindlela ezahlukene. Bakhona abantu abathanda uZodwa futhi abazifela ngomaskandi kanjalo nabathanda umaskandi, abazifela ngoZodwa.

"Ngakho kungaba yinto enhle kubona ukubahlanganisa emcimbini babe ndawonye," kusho uSibiya.

Uthe uyakuqonda ukuthi abantu uZodwa bamazi njengowesifazane ojabulisa abantu ngendlela ehlukile, kodwa kulo mcimbi ngeke enze okudlulele.

 NguZodwa Wabantu ozobonakala eRoka Fella Club, KwaNongoma ngomhla ka-26 kwephezulu.

"Kulo mcimbi uZodwa ngimxwayisile ukuthi kumele angenzi okudlulele njengoba sazi ukuthi KwaNongoma kuseHlalankosi, ngakho kumele sibe nenhlonipho, wangithembisa ukuthi uzobe evunule, egidela izingoma zikamaskandi," kusho uSibiya.

Uthe kulo mcimbi abantu bazothola ithuba lokuzibonela uZodwa eduze futhi evunule ngokwesintu.

USibiya uthi lo mcimbi uyingxenye yomzungezo kaZodwa wokuhambela izindawo.

"Sikhethe ukuhambisana nomculi kamaskandi ngoba siyazi ukuthi abantu baKwaNongoma bayawuthokozela. Uma sesiya kwelinye idolobha sizokhetha umculi ohambisana nabantu bakhona.

"Njengoba sazi eThekwini, bathanda igqom ngakho uma sesifinyelela khona sizokhetha ngokunjalo," kusho uSibiya.

Ethintwa uSomnandi, uvumile ukuthi uyawazi lo mcimbi, wavuma futhi ukuthi uzobe eqashiwe kuwona. Ebuzwa mayelana nokuhlanganiswa noZodwa, uqale ngokuhleka, wabe esenxusa ukuba kuxhunyanwe nomhleli womcimbi.