NGUKHAMA Billiat ejabula nozakwabo eqenjini lesizwe laseZimbabwe, uMarshal Munetsi.

ISITHOMBE NGABE: BACKPAGEPIX

Mfanafuthi Ndlovu

BAFUNA ukunyomfa izinhlelo zabathandi bakanobhutshuzwayo baseNingizimu Afrika abadlali beZimbabwe ezoshukana neBafana Bafana kowokuhlungela iNdebe yoMhlaba yeFifa ozokuba ngoLwesihlanu ngo-18h00 eMoses Mabhida Stadium, eThekwini.

Ngemuva kwalo mdlalo, iBafana izovala le midlalo yokuhlunga ngokudlala neRwanda ngoLwesibili ngo-18h00 eMbombela Stadium, eMpumalanga.

I-Urban Warriors - osekufana nokuthi lo mdlalo isiwudlalela ubumnandi - ithi ifuna ukugcina isithunzi sayo kunobhutshuzwayo ngokunqoba lo mdlalo kumnyama kubomvu.

Leli qembu liza kulo mdlalo nezinguquko ezimbalwa kwazise lisondeze noKaitano Tembo ebhentshini.

Lo mqeqeshi kubhekwe amangwevu akhe kwazise usenesikhathi eside esebenza kuleli.

NGU-KAITANO Tembo wodumo lokuba sebhentshini leSuperSport United neSekhukhune United, osekweleqembu lesizwe laseZimbabwe .

ISITHOMBE NGABE: BACKPAGEPIX

UDivine Lunga oyisitobha seZimbabwe, utshele abezindaba ukuthi bawubheke ngabomvu lo mdlalo ngoba amaphutha amaningi abebewenza emuva sebewalungisile.

Uthe isikwati sabo sesikhombisa ukuhlangana ekhempini, okwenza bangesabi ukubhekana neBafana yize bezokube bewugijimela eNingizimu Afrika lo mdlalo.

UKhama Billiat ongumgadli walesi sikwati, uthi nakuba lo mdlalo uza nengcindezi enkulu kubona, njengoba bezowudlalela kuleli, kodwa bazimisele ngokuwunqoba ukuphoxa iBafana phambi kwabalandeli bayo.

Sekuwumlando ukuthi ubudedengu bezikhulu zeSafa yibona obufake elakuleli enkingeni yokudinga amaphuzu agcwele emidlalweni emibili esele. IFifa yephuce elakuleli amaphuzu amathathu ngokusebenzisa uTeboho Mokoena ekubeni wayenamakhadi amabili aphuzi kubhekwene neLesotho ngasekuqaleni kwalo nyaka, okususe iBafana esicongweni sika-group C, kwahlala iBenin.