'YiZimbabwe isithiyo esikhulu seBafana'

NGUMQEQSHI weBafana Bafana, uHugo Broos (okwesobunxele)

ISITHOMBE NGABE: BACKPAGEPIX

Senzo Sokhela

UMQEQESHI weBafana Bafana, uHugo Broos, ubona iZimbabwe kuyiyona ephethe isikhiye saleli qembu sokungena emqhudelwaneni weNdebe yoMhlaba yeFifa ozokuba se-United States of America (USA), eMexico naseCanada ngonyaka ozayo.

IBafana izotholana phezulu neZimbabwe koka-group C wokuhlungela indebe yomhlaba ngoLwesihlanu ngo-18h00 eMoses Mabhida Stadium, eThekwini.

Iya kulo mdlalo nje, kuqaqamba izinhliziyo njengoba iFifa isanda kuyephuca amaphuzu amathathu emuva kokuba iyithole inecala lokudlalisa uTeboho Mokoena enamakhadi amabili aphuzi ibhekene neLesotho.

Ibe isisuka esicongweni saleli qoqo yehlela endaweni yesibili, iBenin yenyukela kweyokuqala.

Womabili la mazwe anamaphuzu awu-14 emidlalweni ewu-8, kanti ahlukaniswe yigoli nje kuphela.

NGUTEBOHO Mokoena weBafana exina uChiwera Tawanda weZimbabwe.

ISITHOMBE NGABE: BACKPAGEPIX

UBroos uthi iZimbabwe yiyona eyisithiyo endleleni yeBafana ebheke emidlalweni yendebe yomhlaba.

"Lo mdlalo (weZimbabwe) yiwona okumele singalenzi iphutha kuwona, kufanele siwunqobe kumnyama kubomvu. Kalidingeki iphuzu kulo mdlalo, kufanele siwathole ephelele.

"Ngikholwa wukuthi umphumela wawo yiwona ozosicacisela ukuthi simi kuphi ngokuya kwindebe yomhlaba.

"Ngingakusho kugcwale umlomo ukuthi iZimbabwe yiyona ephethe ukhiye wethu wokuya emidlalweni yendebe yomhlaba," esho.

IBafana izosonga leli qoqo ngokudlala neRwanda ngoLwesibili ngo-18h00 eMbombela Stadium, eMpumalanga.

Amathikithi omdlalo weZimbabwe neBafana asatholakala, kanti abiza u-R80 eTicketPro.

Iqembu leBafana selilonke limi kanje:-
Onozinti: URonwen Williams, uRicardo Goss noSipho Chaine.
Izitobha: UMalibongwe Khoza, uKhuliso Mudau, u-Aubrey Modiba, uKhulumani Ndamane, uMbekezeli Mbokazi, uThabang Matuludi, uSamukelo Kabini noNkosinathi Sibisi.
Abasesiswini: USiphephelo Sithole, uTeboho Mokoena, uBathusi Aubaas, uThalente Mbatha, uThapelo Morena, u-Oswin Appollis noSipho Mbule.
Abaphambili: U-Evidence Makgopa, uLyle Foster, uTshepang Moremi, uMohau Nkota noMduduzi Shabalala.