NGULUKHANYO AM oyisekela likakaputeni weSharks.

ISITHOMBE NGABE: BACKPAGEPIX

Sazi Mkhwanazi

KUNYUSE amathemba kwiHollywoodbets Sharks ukubuya kwabadlali baleli qembu laseThekwini abebeyingxenye yamaBhokobhoko aqukule iCastle Lager Rugby Championship ngoMgqibelo odlule emuva kokushaya i-Argentina ngo-29-27 kowokuvala lo mqhudelwano.

Lo mphumela wenze AmaBhokobhoko aqeda esesicongweni se-log yamazwe amane agijima lo mqhudelwano - okuyi-Australia, yi-Argentina, yiNew Zealand neNingizimu Afrika.

Ukubuya kuka-Ethan Hooker, uVincent Koch, uBongi Mbonambi noMakazole Mapimpi kwiSharks - eyiqale kabi imidlalo ye-United Rugby Championship (URC) - kuzoyisiza ukuyiqinisa njengoba izobhekana neLeinster kowe-URC ngoMgqibelo ngo-18:30 ekuhambeni.

Leli qembu lase-Ireland yilona eliyizingqwele ze-URC, kanti kuyaziwa ukuthi kalibhenywa kulo mqhudelwano.

ISharks ivule ngenduku kule midlalo ihlulwa yiGlasgow Warriors yaseScotland ngo-35-19, kowesibili yadlala ngokulingana neDragons yaseWales kuba ngu-17-17.

Yonke le midlalo ibisekuhambeni.

NGUMAKAZOLE Mapimpi ongomunye wabadlali ababuyile kwiSharks.

ISITHOMBE NGABE: BACKPAGEPIX

Isekela likakaputeni weSharks, uLukhanyo AM, lithe kuyalisiza leli qembu ukwandisa abadlali, kwazise lokho kwenza ingabonakali imbobo uma kukhona abalimele noma abayingxenye yamaBhokobhoko. 

"Isihlabe umxhwele indlela abadlali abasebancane abanikwe ithuba abakhombise ukuzimisela ngayo kule midlalo emibili esesiyigijimile. Isizini isaqala, sisenethuba lokujika izinto," esho.

 Ephawula mayelana nokubuya kozakwabo abebeseqenjini lesizwe, uthe: “Bangabadlali abanohlonze, kuzosisiza kakhulu ukubuya kwabo,” esho.

Uthe imimoya iphezulu kubadlali ukucoboshisa iLeinster.

Uchaze izitha njengeqembu elibophele abadlali bezinga eliphezulu, okufanele uma udlala nazo, uwasebenzise ngendlela amathuba owatholayo.

ISharks izobe igijima umdlalo wokugcina kwemithathu yohambo lwayo lwase-Europe. Izobuyela eHollywoodbets Stadium, eThekwini isizobhekana ne-Ulster yase-Ireland mhla ka-18 kwephezulu.

Isiyonke imidlalo ye-URC kule mpelasonto, imi kanje:-
NGOLWESIHLANU:
Munster vs Edinburgh 20:45
Scarlets vs Stormers 20:45
NGOMGQIBELO
Ospreys vs Zebre 16:00
Benetton vs Lions 16:00
Glasgow Warriors vs Dragons 18:30
Leinster vs Sharks 18:30
Cardiff vs Connacht 20:45
Ulster vs Bulls 20:45