Kuzovalwa imigwaqo emqoka eThekwini
nge-Absa 10k

KUNOMGIJIMI onenhlanhla ozogoduka ngonyanyavu lwemoto ezowinwa kulo mjaho ongeSonto ekuseni.

MZWAMANDLA ZONDI

UMGIJIMI onenhlanhla uzogoduka nonyanyavu lwemoto yakwaCherry kwi-Absa Run Your City Durban 10k ezokuba ngeSonto kusuka ngo-07h00 ekuseni emgwaqweni uMasabalala Yengwa, phambi kwaseMoses Mabhida Stadium, isongwe eThe Globe, ngemuva kweSuncoast Casino, eThekwini.

Ngaphambi kokuqala kwalo mjaho, kuzotonyulwa amagama abasubathi abayisihlanu abazobanga le moto ezogoduka nozokuba nenhlanhla. Uma umsubathi onenhlanhla eseqede ukugijima, uzonikezwa imoto yakhe.

Kulindeleke izinga eliphezulu kulo mjaho ophethe isicoco sika-R33 000. Phakathi kwabasubathi okubhekwe ukuba badle ubhedu kukhona uJoshua Cheptegei wase-Uganda owunqobe ngo-2017 nango-2018, uFelix Masai waseKenya, uKabelo Mulaudzi ovikela isicoco, ukubala abambalwa kwabesilisa. Kwabesifazane kukhona uTayla Kavanagh onqobe ngo-2021, kube nguBrenda Jepchirchir noBeatrice Chepkoech ukukha nje phezulu.

Lo mjaho uzophazamisa imigwaqo eminingi enkabeni yedolobha njengoba uzosukela kuMasabalala Yengwa (NMR) ubheke ngaphakathi eThekwini. UMasabalala Yengwa uzokube uvaliwe ingxenye yawo enkulu. Abashayeli ngeke bakwazi ukuphuma kuMasabalala bayojoyina u-Argyle kusuka ngo-00h00 kuze kube u-09h30. USomtseu uzovalwa nawo ngesikhathi esifanayo, kube wuKingsmead Way uma uyongena enkundleni noma uya eStandard Bank, nawo uzokube uvaliwe, kwehliwe kudlulwe kuKE Masinga uma ubheke oKhozini FM. NoBram Fischer wonke uzovalwa ngesikhathi esifanayo.

UDr AB Xuma (Commercial Street) noMonty Naicker (Pine) izovalwa kusuka ngo-06h00 kuya ku-10h00. USamora Machel (Aliwal) ophakathi kukaMonty Naicker noDr Pixley KaSeme (West), uzovalwa nawo ngesikhathi esifanayo njengoba umjaho uzongena kuWest Street, udlule phambi kwaseCity Hall, ujike ngoDorothy Nyembe, ujombe u-Anton Lembede (Smith) uye kuVictoria Embankment, ubuye ngo-Aliwal sewungena kuSmith. Uzosuka lapho uhambe  uyojika ngoShepstone Road, ubuye ngawo udlule kuWest Street sekubhekwe kuKE Masinga, bese kuba wuPlayfair kudlulwe kuPavallion Terrace sekubhekwe kuSnell Parade ngasebhishi.

Le migwaqo engasebhishi uma kudlulwa kuWest Street izovalwa ngo-06h00 ivulwe ngo-11h00. Abagijimi okuzoshaya u-08h45 bengakafiki ku-5km bazokhishwa, bafakwe komunye umzila ukuze bakwazi ukuqeda umjaho. Umzila abazongena kuwona kuthiwa uzokube ulingana nebanga elibasalele.