Izogijinyelwa eThekwini iKZN Premier's Cup

IZOGIJINYELWA emalokishini aseThekwini iKwaZulu-Natal Premier's Cup esiza amakilabhu esifundazwe ukuvivela ukuqala kwesizini esuke izothwasa.
Le midlalo izogijinywa ngempelasonto yomhla ka-25/26 kuJuly eSugar Ray Xulu Stadium (eClermont), nasePrincess Magogo Stadium (KwaMashu).

Ukuqhathwa kwamakilabhu azogadulisana kulo mqhudelwano kwenziwe ngoLwesine ntambama kwelinye lamahhotela agudle ulwandle eThekwini.

IRICHARDS Bay FC yiyona ezokube ivikela isicoco seKZN Premiers' Cup esinqobe nyakenye. Lapha iBay yayemukela inkomishi kuNdunankulu uThami Ntuli.

Lo mqhudelwano uzovulwa yiLamontville Golden Arrows ezoshukana neMilford FC ngoMgqibelo womhla ka-25 ngo-10h00, kuthi iDurban City igadulisane neRichards Bay FC ngo-13h00 emidlalweni yamaQuarter-final. Ngawo uMgqibelo ngo-16h00 kuzotholana phezulu AmaZulu FC neMidlands Wanderers kwiSemi-final yokuqala njengoba la makilabhu engadonswanga ukudlala kuma-quarter final. Yonke imidlalo yangoMgqibelo izokuba seSugar Ray Xulu Stadium.

Ngakusasa ngeSonto ngo-10h00 kuzogijinywa iSemi-final yesibili lapho okuzotholana khona phezulu abazokube benqobe kuma-quarter-final. Owamanqamu uzokuba ngo-14h00.
Le midlalo ihlelwa wuhulumeni wesifundazwe ngenhloso yokusiza amakilabhu esifundazwe agijima ezigabeni zePremier Soccer League (PSL) ukulungiselela ukuqala kwesizini.

IKwaZulu-Natal izigqaja ngokuba namakilabhu amaningi (5) kunazo zonke izifundazwe kwiBetway Premiership neyodwa kwiMotsepe Foundation Championship (MFC) okuyiWanderers. I-KZN yiyona enamakilabhu amaningi kwiPremiership ukuzedlula zonke izifundazwe zakuleli. KwiPremiership igabe ngeBay FC, i-Arrows, uSuthu, iMilford FC neDurban City.